美記報細數鴻運紮紮跳 -- 海典任你講

[ Login ] [ Contact Forum Admin ] [ Main index ] [ Post a new message ] [ Search | Check update time ]

Subject: 美記報細數鴻運紮紮跳

Author:
Conny
[ Next Thread | Previous Thread | Next Message | Previous Message ]
Date Posted: 13:47:10 08/28/02 Wed

From apple daily
美聯昨日在兩份報章刊登廣告，話自己促成珀麗灣約一千宗交易，大勝同行，重整埋個表，列出各代理行成交量。鴻運田國強睇到後大為不滿，發公開聲明，話做 236 宗成交，唔係美記所講只有 130 宗咁少，以正視聽。
鴻運將做到 236 個單位傳真畀傳媒，以示「真金不怕紅爐火」。重指美記作為上市公司，在未經佢同意下，亂咁發放涉及鴻運而又未經證實數字，深表遺憾。田生更表示會保留追究權利。
美聯方面就對蘭西講，佢係從好多渠道收集各代理行成交，相信係堅至登，但數字有偏差唔出奇。美記重覺得沒有需要事先問過對方至登。
講開美聯，佢噚晚又為珀麗灣搞慶功，開成 20 圍，重請到新地雷霆到場。另一邊廂中原同樣再擺慶功宴，雷生同樣出席捧場，認真畀面，唔怪得代理肯同佢搏啦！

西報老屈分析員
新地馬灣珀麗灣呎價問題，曾令市場訊息大混亂，估唔到事件重有下文，一份西報跟進報道，重搵埋豐證券分析員發表評論，但該分析員噚日向蘭西大吐苦水，話西報誤解佢意思，寫到佢話新地發放訊息混亂，點解當初冇就價錢出錯作出澄清咁，但佢就根本冇興趣去深究呢件事。

長實記者會一鑊粥
長實噚日開記者招待會，介紹大角嘴凱帆軒有幾咁正，包括有全港首創先進家居科技 MagicHome ，首 20 名內購買家獲贈 Sony VAIO 最新款手提電腦一部等。但呢個記招安排得十分騎呢，所以蘭西想唔彈下佢都唔得。
第一，上到售樓處，姐姐知道唔係買家係記者，即「晚娘」面口；第二，來自長實邀請信，完全冇講同邊個合作，但長遠電信信，就大大隻寫住同長實旗下 iVision 合作。問個究竟時，長遠代表話，其實唔知同長實邊個單位傾，而長實營業經理竟然話 iVision 根本冇參與，唔知點解會咁樣 … … 總之，長實記者會竟然搞成咁，無話可說。

渣打為銀主貨買保險
發展商成功造勢令一手市場鬧哄哄，但二手就「謝」晒，最受影響當然係銀行銀主貨，因為唔係得一個半個單位，而係一大批。為吸引買家，方便散貨，渣打銀行向 First American Title Insurance Company ，為月底拍賣一批銀主物業買保險，假如買家投到之後因業權出現問題而蒙受損失， First American 就會賠償。業權保險保費由渣打畀。
蘭西聽業內人士講，家買銀主盤碰上業權有小問題的機會好微，不過對買家來講，唔使出一個仙就可以獲得多一重保障，點都有著數，唔怕一萬最怕萬一嘛。
蘭西

[ Next Thread | Previous Thread | Next Message | Previous Message ]