Subject:  最美的中五(3-5) |
Author:
火仔
| [ Next Thread |
Previous Thread |
Next Message |
Previous Message
]
Date Posted: 21:49:35 11/22/03 Sat
第3集:機會
..........................................................................................................
鄰座女孩:"o下?香口膠呀。爽浪檸蜜,要唔要?"
我:"哦,好..多謝。"(一大清早害我受這麼大刺激)
她於是便從裙袋入面拿出一排爽浪,擠出一粒,放到我手上。
鄰座女孩笑了笑:"我叫何嘉瑤,你叫我阿YU或者瑤瑤都OK。"
我對這突如其來其來的鄰座女孩,其實還是很不知所措,為什麼要對我說話?(笨問
題)為什麼要請我食爽浪?(這是一個更笨的問題)
註: (由於辟邪多年來也受女性排擠,所以突然殺出這可愛的女同學,故此不知所
措)
我反應慢了三拍:"哦.嗯。"
YU:"你唔食爽浪?放嚮手會溶。呵呵~"(其實唔會)
我:"我叫...."
YU不讓我說下去:"我知,人名表有寫。我見D Repeater(重讀生)叫你做辟邪,好得
意,我可唔可以叫你做辟邪?(你叫了2次)"
我仍然是慢了2拍:"嗯,可以..."
那個老不死班主任此時正注視著我們(可以用我們嗎?)。
班主任大喝:"喂,果2位同學第一次見面就傾得咁投入,有無當我存在?好收聲啦!"
YU小聲在我耳邊:"喂,一陣再傾,你有無手提?"
我:"嗯,有。"
我就將我個手提放左入櫃筒,就聽個班主任講上年講過o既台詞,好大機會年年
都一樣。第一日返學感覺很好,突然有個女同學搭訕,(重要係好靚果種),又見到思
慧,雖然佢一直無理過我。而大眼睛又不見了,但我有一種說不出的安定感,可能是
重讀的關係吧。我生活上某些東西像是打亂了,但又有某些東西不知不覺排好了。
而座在身邊的瑤瑤感覺好Nice,可以說是第2個和我搭訕的女孩(第1是盈盈),總之
一切都好順利。大家能覺得我好花心,但事實上只是鐘意思慧。可能是因為盈盈關
係,我可以將"愛上"和"喜歡"分得好開。
大家可能沒有興趣知道思慧是一個怎麼的女孩,
但容許我介紹一下好。第一次見思慧時,是在中四時。由於跟阿康是同班,他
問我有沒有喜歡上人,他說班中的女同學都不太像樣(他真的是這樣說的)。於是我
便開始留意班中女同學,我被那個修短頭髮的思慧吸引著。也許她不是最美的那一
個,即使阿康常常嘲笑她沒身材,但不知不覺地迷戀上她,認定她是唯一的。這是一
件危險的事,為什麼?因為就是這樣,我就沉溺了2年。我迷上她的笑容,她的小動作
她聱線,她的所有。思慧是校隊運動員,跑步,打籃球,游水...她都很在行。什麼一大
堆的獎牌,她拿了不少。愛運動的女孩,大概有健康的膚色,她就是好例子,一身淺古
銅色皮膚。可能是因為我太害怕的關係,我一直都沒跟她說,我覺得我比她差太遠,
我沒有去追求她。我只是一直守候著,子騖說我是死心眼,一但迷上,就是放不了
手。我認的。而且思慧也有其他追求者,因此我就把感覺掩蓋了2年。我不會迷茫,
我很清楚的。
"喂~你諗咩咁入神啊?"瑤瑤輕輕地問。
我:"哦,無咩,真係無。"(這個側面很美)
YU:"哦,咁專心D上堂,一陣又比人鬧啦。"(又對我笑)
鬼整咩,什麼煩惱都一掃而空。(你j真係好咸濕)
我的那一班有4個重讀生,一個是我,一個是思慧。一叫傑仔的男生,他好像和思
慧是有什麼關係,有待查證,他也像思慧一樣是運動型,他們好像是出雙入對。最後
一個是樣子很傻的男生,但是彈鋼琴很厲害,我們都叫他做李雲敵,他好像是什麼8
級,7級,這個不太清楚。新同學第一個認識便是瑤瑤,坐我前面的是一個帶黑邊眼
鏡的女生,聽瑤瑤說那女生是天生的老花,所以她帶的是老花鏡(像放大鏡),加上她
眼睛很大,因此大上加大,有點怪。她扎了馬尾,而且她聲線很好聽,很柔,像是江南
地方姑娘獨有的"吳濃軟語"(大家懂不懂),像在哪聽過。我想眼鏡下的她會是不
錯。坐右前方的是剛選出來的男班長,像是很勤力的樣子,只是個子比較小,他寫字
速度極快,奇人異士真多。上了3小時課就是認識了這麼多的同學,我和其他同學熟
絡後再為大家介紹。
剛剛學校放食Lunch,子騖就打電話來。我正拿起電話,瑤瑤就揮手走了出班房
,其他人也走了。
子騖:"喂,出來校門口等,我約o左阿康。"
我:"嗯,盈盈呢?"
子騖:"佢同我一齊呀,你快D。係咁"
出到校門,他們三個都到了,如果是要我自己一個人去食Lunch,我會唔舒服。
我:"食咩呀?"
子騖:"唔好諗住,講過好消息你知。"
盈盈:"嗯嗯,呵呵~"
阿康奸笑:"好o野o黎o架。"
我:"咩事先,去凱旋門(中高級餐廳)食,你地請?(流口水)"
子騖:"淨係掛住食。係有個去寮屋住o既camp。"
盈盈:"係寮屋生活體驗計劃營。"
我:"o下,寮屋,好殘果D屋呀?"
子騖:"係呀,學生會攪(他們是學生會骨幹成員),你個思慧都去。"
阿康:"係呀,佢係學生會康樂,一定要去。呵呵,你得米啦~"
我:"真定假?我去我去,不過唔知有無位..唉"
子騖:"我地係學生會幕後攪手,你估有無位?"
盈盈:"我會同你去,子騖就唔去,阿康呢?"
阿康:"我唔啦,天體營就一定去。(你比我咸濕)"
子騖:"o拿,咁就好好計劃o下點主動出擊。"
盈盈:"等等,呢張o野係講個Camp D o野,去睇o下啦"(盈盈好細心)
阿康:"喂,我餓啦~食凱旋門,重唔係辟邪請?~"
~完~
第4集:愛一個人有錯嗎?
..........................................................................................................
感謝上天給我一個奢望。我其實打算在去CAMP時,找個2人獨處的機會,去跟思
慧表白。雖然台詞,表白的時間也準備好,而且盈盈也說幫我制造機會,但我心裡有
1千個怕,1萬個怕。因為我聽講上天專會玩弄有準備的人,Anyway我今次要試試。
我記得開學初瑤瑤問我有沒有手提電話,不用等我問,我的手提裡己經有她的電話
號碼(她自己input入去)。更有趣的是瑤瑤拿了我的電話影相,還是在上堂的時候,
而且我是不知道。雖說手提電話內置的數碼相機解像度低,但她拍的這張相,滿清
楚的。這張相是從右下角影著她的側面。我其實不介意瑤瑤的可愛,但是她好像對
其他人不是這樣的,或者是我看來比較傻,是玩樂的對象(沒其他意思)。現在的我
只能這樣想,也不希望想太多。
我這天一早就回到學校,我看見瑤瑤有些慌忙,其他人也有點慌。
瑤瑤:"哎呀,你有沒有做Maths?"
我:"果5條數?有,你要?"
瑤瑤:"嗯,我無做..."
我從書包裡拿出功課:"你拎去啦。"(抄功課是不對的,大家別學)
當大家見我借出功課,都爭相問我借,課室裡借功抄之聲此起彼落(好一間Band1)
。問我借文學習作的是業記,業記是主動跟我搭訕的,他最愛聊女仔,又常常說色情
笑話,但交個朋友也不壞。此時盈盈走了進來,站在門口。
我揮一揮手:"我嚮呢度。"
盈盈走了過來。
我:"你唔會係同阿康一樣,入錯班房掛?"(阿康昨天失魂,入錯我班房。校草光臨,
班中女同學議論紛紛)
盈盈:"梗係唔係啦,我來問o下你班邊個會去。我知好多人想去,所以問o下你班先
。呀係,你填o左form未?"
我:"哦,填o左依家比你?"
一邊抄maths的瑤瑤說:"呀,係唔係果個寮屋camp,好似幾好玩咁,我都想報~"
盈盈:"好呀,又有多女仔倍。o拿,比份form你先。"
我:"會有好多女仔去咩?全部名額有幾多人?"
盈盈:"唔...都唔少,名額有十幾個。"
這個好色的業記對於女性特別敏銳,插嘴說:"呀,咁我可唔可以去?"
盈盈:"好呀,呢張係個camp o既章程,份form嚮後面。"(盈盈,這是個錯誤的決定)
業記笑笑地說:"好,唔該晒你~"
盈盈:"唔洗,咁你地2個快D填好交來6B比我啦。咁,阿邪,我走先啦。"
我:"嗯,咁Lunch再約。"
盈盈沒走多遠業記就在我耳邊問:"喂,佢係唔係你女友?'
我:"你估錯。"
業記:"咁頭先個靚女去唔去?"
我:"你話盈盈?佢去呀。"
業記:"哇,正呀,好似好多又靚又索o既女去,等我去o下界先。"(所以我說是錯誤的
決定)
我冷冷地笑:"嘿嘿...."(你敢?你可能走不出校門口)
盈盈在門口遇上了寶意,就是那個帶老花眼鏡o既女仔,她們好像談了一會,盈盈
比了份form寶意。
2~3日之後盈盈就比電話我。
電話裡面說:"喂,去camp份名單出o左啦,你要唔要知?"
我一邊做功課一邊用面頰和肩膀夾著電話說:"嗯,我想知啊,思慧係唔係實去?"
盈盈:"係呀,咁你準備好未呀?"
我:"哇,中秋先去依家重好早..."
盈盈:"唔係呀,我話你表白D o野,準備好未?"
子騖中途殺出:"係呀,呢D o野要一早準備。"
我:"哇,你地玩3 Line(電話3人會議)。我查實係知道有camp果日就攪掂好。"
子騖:"咁就好啦,洗唔洗排(練)下佢?"
我:"哦,搵日。"
盈盈:"喂,子騖唔好嘈住先(子騖抵死),咁你果班有5個啦,你啦,伍思慧,何嘉瑤,
石寶意啦,重有個男仔...叫咩名呢?"
我:"業記係唔係?"
盈盈:"嗯,無錯。(果然係佢=.=)其他都係第2班,重有我。校長都去。"
子騖:"校長都去?唔係掛。"
我:"唔緊要啦,佢都幾Nice,係唔係新來果個?"
盈盈:"係呀。呀,重有個社工,係女仔。(業記一定開心死)"
子騖:"喂,我去沖涼,你地傾住先,係咁先。"
我等子騖掛了線,說:"盈盈,中秋去,你緊唔緊要?"
盈盈:"咩緊唔緊要?"
我:"我話你洗唔洗陪子騖,佢又唔去camp。"
盈盈:"唔....沒什麼啦...嗯。"
我聽得出盈盈有一種淡淡的傷感,在某程度上我同盈盈對感情的處理都是一樣笨拙
。沒法子。
我:"咁我做功課先,想搵人傾計就搵我啦,呵呵。"
盈盈:"嗯...多謝,咁再電聯(電話聯絡)啦。掰掰"
這晚我想了很多東西,我想盈盈對子騖的感情最後會怎樣結果?我迷上思慧又是
否對?如果愛上一個人不是錯,又為何這樣的苦?為什麼要愛上一個不愛自己的人?
這樣地表白會有意義嗎?我不懂,這些問題我己經想了2年。所以無論如何也要表
白,可能成功與否不再是最重要。
到了中秋前夕,即是去camp之前果日,瑤瑤約我去食飯。
瑤瑤:"喂我地去食lunch,好唔好?"
我笑了笑:"做咩會約我?"
瑤瑤:"無呀~你成日幫我抄功課,又請我食o野,所以...."
我:"你講到我面都紅啦,今日無人陪我食,我同你去好唔好?"
瑤瑤:"嗯,一陣可以傾o下去camp D o野。上堂啦,Miss入o左來。"
同瑤瑤食飯好開心,因為唔知點解佢可以將氣氛控制得很好,一男一女撐台腳都
完全沒有尷尬。平日上堂都有講有笑,瑤瑤又不同其他會很放浪(即是姣)的女孩,
總之是很輕鬆。我認是對瑤瑤有好感,但是我對思慧是不會動搖的,我想是吧...大
概。
瑤瑤在找東西:"哎呀,怎麼不見了.."
我:"嗯?點樣呀你?唔見o左銀包?"
瑤瑤:"係呀,唔知係唔係留o左嚮學校。"
我:"唔緊要啦,今餐我請啦。"
二話不說,我就了去埋單。
瑤瑤:"唔好啦...喂~"
瑤瑤像有些心事:"唔...多謝。"
我:"呵呵,我地走啦。等我去買排爽浪先。"
到了去寮屋當日的中午,我就回學校習合。中秋節關係,燈籠,蠟燭,月餅必備(沒
錯,我連月餅都有帶,是冰皮...)。由於是去2日1夜關係,不用帶太多東西,加點節日
氣氛也不錯。好,出發!
~完~
第5集:再遇
..........................................................................................................
可能大家不會相信,那個業記一上van仔就不停在我耳邊說:"喂,正啊!好多
女。"我也不知該給他一個什麼反應。一行十五人,有8個都是女孩。雖然是中秋節
,不過天氣還沒有轉涼,所以大家所穿的夏季裝,業記更覺興奮。新校長也是隨行的,
由於老校長退休了,剛40出頭的校長接任。新校長本來是個心理醫生,而且又是什
麼博士之類。新校長很親民,每天早上也站在校門口跟打招呼,態度好Nice。在車
上,等大家坐定之後,校長就問大家要電話no.重有E-mail,不過大家都很樂意。我來
告訴大家在車上各團友在做什麼。盈盈,嘉瑤跟寶意,三個一拍即合,傾得很投契。
業記就不斷聊女仔,又同男團友一起說一些色色的事情。(算你走運,校長沒聽到)
思慧就一個人坐在車尾,望著窗外,感覺上她對別人總是十分冷淡,但是我覺得這樣
的她仍是很吸引。校長在整理剛收集回來的電話no.同E-mail地址。女社工就站了
起來為大家講解寮屋的事情。其他人都有自己的事情做。坐我身邊的江仔,面有難
色。
我:"你有無事,我睇你個樣好病咁。"
江仔:"我...好暈,有D..想嘔咁樣。"
我:"我諗司機好難停比你,不如我比個袋你先,你想嘔就嘔落去啦。近車尾搖
得好勁,你坐前去。(我從袋裡拿出藥膏)我無白花油,呢度有萬秀蕾敦,
查D升會好少少,重有唔好望窗外Do野會重暈。你抖o下先。到我叫你。"
江仔(聽完一大輪,可能重暈):"嗯..唔該晒你。"
坐前頭的盈盈:"江仔係唔係見暈,我同你調位。"
司機叔叔暗道:"依家D後生真係,坐車都話見暈。"
嘉瑤:"我又調。"(洗唔洗2個都要來)
盈盈:"寶意都一齊調來。"(洗唔洗3個)
我心想,反正有位,我都唔介意,而且好鐘意。盈盈來多D o野講。
在後面的業記說:"喂,邪哥仔,你好受歡迎。"
盈盈剛走到來:"唔洗理佢。寶意同,瑤瑤坐前面啦。(跟住自己就坐低o左)
寶意:"你好似保姆。"
我:"唔係掛?一般似..。"
瑤瑤:"你識急救?我見你好Po(專業)。"
我:"都唔係...。"
盈盈:"佢係咁,咩都識,重識煮飯。果次新年大掃除,重幫我攪到間屋好乾淨,來食
飯又要幫我洗碗。總之咩都OK..."
我:"哎呀...夠啦,你好Hard Sell。"
盈盈:"你真係咁。呵呵"
我好耐無比人咁讚:"唔好講呢D,今晚食咩?"
盈盈:"打邊爐呀,一陣你要同我去買打邊爐D料。"
我:"無所謂,2個人夠唔夠拎。又有行李。"
盈盈:"寶意話會幫手,社工姐姐都去。D行李叫D男仔幫我地拎去先,瑤瑤幫我
地看住D男仔,好唔好?"
瑤瑤:"好,等我看實佢地!"
我:"咁個社工跟我地去,咪無人帶路。"
盈盈:"唔會,社工比o左絛鎖匙(寮屋鎖匙)校長,校長去過幾次,佢帶其他人
去先。"
我:"OH~I see。"
盈盈:"我叫o下思慧睇佢去唔去。喂~思慧,你去唔去幫手買食送?"
(盈盈果然言出必行,話幫我製造機會)
思慧冷冷地說:"唔啦,我去寮屋先。"(衰o左)
盈盈:"哦,咁好啦。(盈盈望著我)無辦法啦。"
盈盈就是這樣很會計劃的人。司機叔叔很快就駛到上水,據社工姐姐說落車之
後要走大約20分鐘路先到寮屋,校長就同其他人去先,社工姐就同購物小組去附近
街市。沿路社工姐姐就講好多關於上水的東西給我們知。上水是分2部份,一邊是
較高的高地,全都興建了三十多層的公共屋村;一邊是較低的低地,都是田地,平原
同小屋。我們十五個人今次要過2日1夜的寮屋就是在低地那一邊。所以一下雨,
雨水便由高地涌去低地,大家成日嚮電視見到新界水患就有一部分是這樣造成。幸
好現在不是雨季,我們今次沒什麼危險。盈盈講得無錯,我真係咩都識,不過只限
半桶水。我覺得我比較任勞任冤,所以今晚打邊爐的食物大部份都是我一個人拿,
還有2支5公升蒸餾水。無他,子騖之前跟我說要對於什麼也要出盡力,為了取得
思慧好感,所以我很想盡力表現自己。因為今晚我要向思慧表白。
社工:"大家知唔知點解我地唔洗買菜?"
我:"我知,無錢。(真笨)
盈盈:"你淨係識諗錢,我地一陣間去落田割菜,今晚打邊爐用呀。"
寶意:"嗯嗯,我想試一下割菜。"
我:"我估新鮮菜一定好好食。"
我們走到一條鐵橋,橫過梧桐河。聽講大水時,有人嚮度比水沖走過。
社工:"大家,對呢條橋有無咩印象?"
我:"我好似幾年前嚮電視到見過。"
寶意:"係唔係果時有差人要收地,D居民唔肯走,就嚮度同警察對峙。"
社工:"係呀,果陣D居民又煤氣樽,又家傳寶刀,又放狗,咩都出齊。"
盈盈:"係呀,報紙都有講。"
社工:"嗯,不過D警察就好蠢,其實重有第2條路入到村。行果度30分鐘可
以清場。依家入村,我行頭,男仔行後。小心有狗,唔好走散。"
我:"等等,社工姐姐,寶意隻腳損o左。"(我行後所以見到)
社工:"咦,係啵。寶意對鞋係唔係緊過頭。"
寶意:"嗯,新鞋,著過2次(托一托老花眼鏡),所以..."
我:"等等(放下手上東西,從褲袋拿出銀包,再由銀包拿出2塊膠布)。
寶意妳貼住先,會無咁痛。到寮屋再用水洗,膠布我重有,要拖鞋
就問我,我有多對。一陣最好唔好落田,可能有細菌感染"
寶意:"啊,真係唔該你,唔好意思~>.<~"(寶意把聲真係好好聽)
註: (之前我說寶意把聲好柔,如果大家想知點柔法,今晚可以在十點左右
轉去亞視睇一睇央視版射鵰,入面黃蓉國語配音,就同寶意把聲差唔
多)
盈盈:"我都話佢好細心啦,佢D Friend就話佢婆(也母) 。"
社工:"嗯,大家要互相幫助。貼好就行啦~"
我其實都不是太過細心的類型,大家說是不是。不過我就好希望在我身邊的
人感到開心,這樣我也會比較輕鬆,因此我覺得自己的存在才有價值。大家可能
覺得我很傻,要這樣才能認定自己。Anyway,大家也有自己的生存方式。 入到
村行了十多分鐘九曲十三彎的路,就見到個camp。聽社工姐姐講間寮屋是由一
位上了公屋的老伯借出來,地方都唔細,重有塊田,十五個人入到去都唔不會太迫。
四周環境好靚,不遠處有座山,其他地方都是田地,重有其他居民住的寮屋。天空
可以說是十分之藍,沒有雲。晚來抬頭一望盡是廣闊的天際,沒有高樓大廈擋著。
今晚來賞月,一定很好玩。
入到屋裡面,班人就換好拖鞋,當自己屋企一樣。其實這也不壞,融洽一些比
較好玩。屋裡面有幾間用木板間開的房,只有一間有門。屋的最左手邊有一條油
上銀色,七八級的鐵梯,通上去閣仔。而屋的右手面是廚房,廚房再入是洗手間同
浴室。屋裡面無電視,無電話,無冷氣,就其他基本的都有。有些特別的就是屋裡
所有電制同插蘇都離地較高,怕被水淹壞。如果一有水患,水深必達一米以上。
這是由屋裡水漲所留下的痕跡可知。
大家(算是)安定下來後,便著手弄晚餐。(那當然是自己攪掂)一些人就準備
洗肉食,我灸跟其他就去了下田割菜。思慧也一起去了,平時不多說話的她,也跟
其他人有了交談。我就是一面割菜,一面想如何在思慧前表現自己,還有今晚的表
白。我跟盈盈一邊拿割好的生菜回屋,一邊談論著。
盈盈:"點?心情如何?準備好未呀。"
我很有信心地說:"嗯,就今晚搵個只係2人獨處機會,我會講。"
盈盈:"嗯,好支持你呀~"(多謝你,盈盈~>.<~)
我:"我其實諗通o左。"
盈盈好奇問:"諗通o左D咩?"
我:"我話係如果得o左固然好,如果唔得的o既話,我會選擇..淡忘。"
盈盈:"嗯,我覺得咁對你或者對思慧都係好事,都兩年啦,係時候了結。"
我們走到屋外,盈盈說:"我地嚮出面洗,入面有人洗緊。"
註: (寮屋廚房的洗手盆對開有個窗,窗下面又有2條水o侯。入裡面看到出
面,出面都一樣。)
我:"嗯,我地洗啦。"
盈盈:"你比心機,我祝你成功啦~"
我:"喂,D 生菜唔係咁meat,要學我咁先OK~"
盈盈:"你唔去學廚真係浪費。"
我:"呵呵,唔會啦~"
瑤瑤從窗口裡面說:"你地洗緊菜呀?"(唔睇都知)
盈盈:"係呀~你要幫手呀?"
瑤瑤:"嗯,唔識整Do野"
盈盈:"呢度D菜我洗得啦,我借個辟邪比你。"
瑤瑤:"嗯嗯,辟邪快D來。"(何必偏偏選中我)
我:"好,我入來。"
入到屋裡面,班人有幾個重嚮到鋤大2,業記一日淨係話要界女。算唔理到咁多。
我:"點呀?D牛丸要咁切2砍刀。水就到o左佢。腸仔要咁樣切D花。一陣開個
爐比D熟油。慢慢整,唔急,我幫你。"
瑤瑤:"哇,你好勁,咩都識咁樣。"
我:"o下唔係掛,。咦,你點解成日帶住隻錶,好得意。"
註: (嘉瑤隻手好幼,但就唔係瘦果隻,我諗佢隻手拖起來會好軟熟。對不起
想太多了。有趣就有趣在佢成日帶住隻錶錶帶好闊,錶面很大,好似想
摭住D o野。)
瑤瑤:"係呀,我媽咪送比我,好唔好睇?"
我:"幾好呀,好得意。"(唔通話好肉酸咩)
瑤瑤:"喂,一陣影相,用你部手提。"
我:"哦..好,。小心切到手。"
吃飯時間,大家就排排坐準備起筷。打邊爐果個爐係駁住家用煤氣樽,即係坐地
高到大脾到。其實都有D牙煙。不過大家都無咩點理。十五個人嚮中秋節,係間
屋仔到打邊爐有幾河?所以大家都食得好開心,食飯果時由於盈盈同瑤瑤都坐嚮我
側近,業記話我左擁右抱,結果比校長叫佢小心說話,嘉瑤就話佢懶鬼,唔幫手做o野
重咁多o野講。業記就咁樣比人杯葛。其實我都唔想,我地個三人,為大家準備,係最
遲入坐,得返3個位,我真係唔想。(大話)
大家食得開心,幫手洗碗的我重開心,一個人洗十五個人份量的碗筷...。一又邊
洗碗一邊望出面好靚o既月光其實也不錯。大家食飽飯就沖涼,班女仔無帶洗頭水同
沐浴露,校長都無帶牙膏,好在我都有,佢地先有得用。江仔重話我個袋咩都有,好似
百寶袋。Lady Frist,女仔沖先,雖然浴室就嚮廚房對入,但我都好專心洗碗,無諗過
話偷睇(我真係無)。浴室開始有水聲(我連邊個沖緊都唔知),由於我帶果支洗頭水
好香,所以連廚房都聞到。順帶一提寮屋係無熱水,大家要沖涷水涼。突然沖緊涼個
女仔大叫。
女聲:"哇.....!"
跟住第二個鏡頭,就係個女仔,淨係披住塊加細碼浴巾,開左浴室門走o左出來。
她全身,頭髮都是濕的。我見到這樣一個情境..完全呆了。她看著我,我看著她。
兩秒之後...咦,點解?係佢?!就是那個我報重讀果日見到o既女仔?!眼大大,好可愛
的那個,沒錯就是她!
~完~
其實有廿幾集ga~
下次再post la
[
Next Thread |
Previous Thread |
Next Message |
Previous Message
] |
|
Feedback: 
Re: 最美的中五(3-5)
Re: 最美的中五(3-5)