| Subject: 因你才有這一天 4 MAY 2002 vs Chelsea |
Author:
steve
|
[
Next Thread |
Previous Thread |
Next Message |
Previous Message
]
Date Posted: 23:54:30 05/05/02 Sun
在發出這個賽後報告之前,
先送一首歌俾你地,
歌名係<<因你才有這一天>>
"不罷不斷 疲倦不寐不眠
不捨不棄 做了不悔不怨
只問耕耘 從來收穫不嫌
一心一意 熱愛一世不變
轉轉轉 光影因你(阿仙奴迷)在轉
變變變 色彩因你(阿仙奴球隊)幻變
看看看 天空海闊 任我高飛
全因你(阿仙奴球隊與球迷) 才有這一天
暖暖暖 心底因(阿仙奴球隊)熱暖
你(阿仙奴球隊)以最好的一再奉獻
要以最好的嘉冕(獎盃) 讓這掌聲
從今天 傳頌百萬年"
聽完歌之後都同大家分析番昨天既表現啦.
昨 天的比賽贏 得黎真的帶一點驚險,
可能因為咁大家會覺得更加高興,更加珍惜.
的確在上半場我們在控球權稍為佔優,
但射門次數卻不及車路士.
而上半場韋拉明顯不在狀態,
成條中場線既搶截工作只靠柏奴亞一人,
當然佢真的是有頭拼到尾,
所以我認為佢係昨天最佳球員.
佢既表現留番等陣再講.
上半場形勢上我們會稍為佔上風,
但一日未領先,
拎住D點數都冇用.
對戰往績確實我們亦是秤先,
不過這些種種都不能成為作戰取勝既條件.
學peter黃興桂話齋,
紀錄係用黎俾人破既,
不過當然,
昨天我們亦得以延續這個紀錄.
兩隊都好努力為求勝出這場比賽,
車路士昨天海鮮完 全售罄,
表現出色,
為阿仙奴製造了不少險象.
當然阿仙奴既球員亦盡心盡力,
因為大家都知道冠軍與亞軍既分別好比打邊爐同打手板.
即使車路士是落敗的一方,
我都要用這裡小小的一角向他們鼓掌,
因為昨天佢地既比賽態度確係值得一讚.
但比賽既野在乎是否能把握機會,
優者勝,劣者敗,
車路士亦只能接受賽果.
話須說回頭,
車路士呢隊波如果唔賣海鮮,
佢地絕對係可以爭標既球隊,
佢地同阿仙奴相似既地方都係歐陸式既踢法,
地面式既推進,
大大打破英超既傳統.
所以下年佢地唔應該繼續賣海鮮,
踢番D正路波對佢地爭逐錦標會有好大的幫助.
阿仙奴昨晚其實有一兩名球員演出比較遜色,
亨利狀態真的是低沉,
當然唔係攪問責制,
而係唔明亨利點解最近踢極都唔順呢?
體力影響又似乎唔會,
因為上場佢冇落場比賽,
有成個幾星期休息.
幾日後面對曼聯,
他表現又會如何還要拭目以待.
當然即使他表現不好,
作為阿仙奴迷都會對佢投下信任的一票.
而韋拉都只係下半場先入局,
上半場如非柏奴亞努力搶截,
可能車路士已經大軍壓境,兵臨城下.
當然下半場韋拉既回復狀態令柏奴亞都稍為舒一口氣,
起碼都可以上前參與下進攻嘛.
如果今年奪雙料冠軍,
韋拉留隊機會便大大提高.
在 此 我 要 再 一 次向韋拉sorry,
因為季初我向他作了不少攻擊,
說他因想離隊而踢得唔好,
但而家佢已大大改善,
我亦樂意向佢表示歉意.
希望韋拉留隊,
幫助阿仙奴踏上新的里程碑.
在超過一百名球迷在shooter52歡呼情況下,
我自己既心情真係好興奮,好緊張,好感動,
猶幸球隊而勝利結束比賽,
令我們得以盡興而歸,
星期六對愛華頓的大戰,
我們將可再感受奪超聯獎盃既氣氛.
當然而家一切尚乎落實,
但我對阿仙奴充滿信心!
聯賽錦標應該都冇走雞了.
如果說昨天最關鍵既球員,
應該要數到施文.
若非他的前仆後繼,
阿仙奴可能會面對落後的困境,
如果真的要落後住黎踢,
我相信阿仙奴要反勝真係唔係咁易,
因為對手的迪里西,加拿斯昨天演出非常穩固.
所以施文連番的撲救,
證明雲加選擇用佢係精明既決定,
胡禮亦應該心服口服.
觀乎昨天奪標後胡禮的神情,
可見他與球隊關係並不如外界所講有芥蒂,
我地亦密切期待胡禮真正成長,
幫助阿仙奴發揚光大,
將掌聲延續百萬年.
羅倫演出亦有水準,
俾拿索斯踢左一腳,
稍事休息繼續搏殺,
而佢昨天在右路的貢獻令拿索斯成日要走入中間用佢隻「生蟲腳」--右腳起腳,
效果自然大大影響.
而羅倫體力化的演出即使助攻力強的巴巴耶路都冇建樹,
後段更被換出.
羅倫會係未來幾年的重要棋子吧,
事實佢亦應該在今屆最佳十一人當中.
阿當斯蘇金保這對組合穩如泰山,
一個好路數,一個有體力,
哈索賓基亦因有傷在身而影響表現,
古莊臣孤掌難鳴,
縱有起腳,
奈何施文傾力的演出,
但其實對古莊臣既價值係進一步的肯定了.
蘇金保加盟第一屆立即獎牌在手,
對球隊既歸屬感一定更高,
如果雲加下屆為佢安排一個可以代替兩老的後防成員,
防線威力誓必更強.
因為有阿當斯,基昂的教路,
即使是新球員也可以盡快融入吧.
高爾昨天又係有精彩演出,
面對速度快既干查依然冇懼色,
腳法上乘的高爾助攻力強,
其實本來佢有一球半單刀機會,
可惜自己推唔順局住二傳,
又未竟全功.
但英格蘭左閘捨佢還有誰?
雖然布歷治係唔差,
但高爾肯定係艾歷臣係第一選擇.
韋托特昨天表現都唔錯,
起碼佢有氣有力,
走上走落,
與羅倫,柏奴亞都有好好既配合,
可惜佢埋門一腳成日撻Q,
否則佢昨晚自己都有入球的機會.
當然今年阿仙奴奪標韋托特功勞唔細,
因佢暫時係陣中出場次數最多的球員,
雖然狀態真係唔係場場keep得到,
但佢既鬥心真的好強,
呢一個絕對係韋托特個人的賣點.
雲加昨晚的部署是出色的,
用人亦十分果敢,
將近來狀態稍稍滑落的伊度放在後備,
放了柏奴亞這名撞得,攔得,射得之人.
其實大家阿仙奴迷一直都講,
柏奴亞係阿仙奴陣中腳頭最重果個,
其實上場對保頓已經有類似射門,
可惜當時貼眉出界,
今次重施故技,
立即成功.
其實柏奴亞真係可以爭番啖氣我真係替佢高興,
98年佢一直表現出色也無緣入選國家隊,
時至今日我認為佢入選機會唔大,
但對佢個人而言真係一個鼓舞,
雖然話就話一個入球唔代表甚麼,
但最起碼幫助到球隊奪冠,
咁就已經係最好既交代.
柏奴亞,
唔入選國家隊唔緊要,
最緊要是阿仙奴迷絕對認為你在隊中係有重要性既!
所以我一直話,
對一個咁忠心既球員即使佢技術唔好,
我一直都唔捨得鬧佢...
今天除左佢,
我都吐氣揚眉!
韋拉上半場如廠長所說,
一切由失縱開始,
但其實佢在上半場時都有個妙傳俾柏金,
可惜頂斜了,
但下半場韋拉明顯上番力,
積極拼搶,
面對勇捍的比堤都未驚過.
其實一些資深的阿仙奴迷可以話真係睇住釧啎j.
我自98年4月先捧阿仙奴,
唔清楚佢加盟時係乜野境況,
但從報章都起碼知道原先佢係一個都幾有勇無謀既中場火爆人物.
但時至今日有咁大既轉變,
更超越師兄比堤,
睇住佢大既球迷真係可能會有很大的感慨.
龍格堡最近狀態大勇,
個個都估佢係first scorer,
即使做唔到首位入球者,
亦能做到奠定勝局亦是十分重要.
龍格堡這名球員由佢加盟我已經覺得佢好勤力,
時至今日,
佢唔止勤力,
更是入鍥能手,
雲加最出色既收購中,
佢一定榜上有名.
柏金受到迪西里既凍結,
表現不出水準是可以理解的.
因為迪西里係一個有身位,有體力既球員,
柏金要甩掉佢都唔係咁易,
但一個好球員,
自己入唔到波唔緊要,
拉得開對手已經係一個成功.
但迪西里即使機關算盡,
卻防不了柏奴亞的一記遠射,
佢可能會係車路士陣中最失望的一人.
成場踢得咁好,
卻敗在柏奴亞腳下.
不過柏金抵讚在佢昨天走動範圍都好大,
由中場走番去對手既禁區,
更時不時出現在進攻路線右路,
雲加換出佢其實合理,
因為四日後又有大戰嘛.
亨利狀態唔好,
更罕見地因為踩波車而甩掉腳下球,
可能佢真係需要一些時間吧.
阿仙奴球迷中個個都咁支持佢,
一時表現唔好唔緊要,
最緊要就是懂得站番起身,
我地密切期待呢一刻,
更加希望佢高舉超聯冠軍的一剎.
還有兩場比賽,
亨利仍有機奪英超神射手,
繼續努力^^
伊度入場主要是因為球隊已經領先了,
加上柏金體力線下降,
伊度入場係正確既調動.
而佢一入場都有助攻,
龍格堡入果球波就係佢傳了.
當然果個唔係D乜野世界級既傳球,
但都叫做有一個assist.
佢果然是盃賽幸運星,
在巴西國內的哥連泰斯,
以至黎到阿仙奴都係一樣.
簡奴入場都係做D駁腳,甚至係hold波政策,
突破不大.
基昂入場亦只係俾佢感受勝利的氣氛,
入到黎都唔知有冇掂波.
五月四,好易記,
到五一一,阿仙奴就一定得.
各球迷預備開定香檳慶祝雙料冠軍,
重奪失落多年的錦標吧.
我們要將這個勝利延續落去,
建立阿仙奴皇朝!
大家俾個"五"我吧!!!
一脈相連 期望一脈相傳........
一生一世 汗血不會污染.......
阿仙奴,努力呀!!!!!!!!!!!!!!
[
Next Thread |
Previous Thread |
Next Message |
Previous Message
]
| |
Feedback: 