VoyForums
[ Show ]
Support VoyForums
[ Shrink ]
VoyForums Announcement: Programming and providing support for this service has been a labor of love since 1997. We are one of the few services online who values our users' privacy, and have never sold your information. We have even fought hard to defend your privacy in legal cases; however, we've done it with almost no financial support -- paying out of pocket to continue providing the service. Due to the issues imposed on us by advertisers, we also stopped hosting most ads on the forums many years ago. We hope you appreciate our efforts.

Show your support by donating any amount. (Note: We are still technically a for-profit company, so your contribution is not tax-deductible.) PayPal Acct: Feedback:

Donate to VoyForums (PayPal):

[ Login ] [ Main index ] [ Post a new message ] [ Search | Check update time | Archives: [1] ]

[ Next Thread | Previous Thread | Next Message | Previous Message ]

Date Posted: 00:58:41 04/01/03 Tue
Author: Abduqadir Jalalidin
Subject: Shu qeder éghir suning awazi

shu qeder éghir suning awazi

Abduqadir Jalalidin

Shamal, Qushqach we Ortaq til

shamal
ortaq bir til
chüshinimiz
körsek uni hemme yerde;
lingshiydiken derexler
tolghinidiken apaq perdiler
shiwirlaydiken yopurmaqlar
bizning qeshqerde
hetta, yaponiyide.
kanazawa* shamalliri
sözleydiken manga yenila
nawayidek shahane tilda
rozi sayittek sehra tilida.
--------------------------------------
* kanazawa -- aptor turuwatqan bir sheher.

shamal chiqsa bizning xotende
qolyazmining hidi kélidu
kohmarimda ashiq - meshuqlar
wedisini qumgha yazidu
tokyo asminida éléktron herp
kislataliq yamghurgha
aylinidu chaqmaqlar bilen
konupka taxtisida kompyutérning
chökmekte qush örligen shölgeyler.

mashina toxtitish meydani
bizning yataq keynide;
pizhghirim aptapta qayturghan nuri
qorimaqta yüreklirimni,
balkonimda datlashmaydighan tömür rishatka
parqirap tursa aptapta
qarichuqlirim sekrep kéter qoqasta.

yaponiye ademliri
qimirlighan intizam
eynektiki zerrichilerdek
muhebbet
anga népiz yalitilghan shakilat
biz uyghurlar
tasadipiy yamghur
hetta qishtimu yéghip qoyimiz.
hemme pesil, hemme iqlimni
birla rengde sizip qoyimiz.

bashqilarni ishlep söyimiz
özimizni chishlep söyimiz
razimen
qansirap turup söyülüshke
qiyamette uyghur pétim körünüshke.

mumkin bolsa eger
yurtumning bir deqiqisini
qamrap élip nepisim bilen
püwlep uni bar ishqim bilen
yer sharidek chongaytqum bar
yaponiye, amérikining aldida
anamni olturghuzup altun textte
perzentimni quchaqlirida
rasa küldürüp oynatqum bar.

hey...
bu yenila bir riwayet.
pul dewride yashawatimiz
riwayetning sulalisini.
tashlimiduq alwun'gha tolghan
qanaetning piyalisini.

ejeb söyümlük bop ketti shutap
döngköwrükning achchiq moxurkisi
öpkemge ketsimu
qénip - qénip shoriwalghum bar.
eslide benggighu emes idim men,
lékin wujudumda shéirning qéni
barche qéliplardin chiqip béqishqa
turup - turup ündeydu méni.

hawachi turubisini kirgüzidighan
bir töshük bar biz turghan öyde
aq qushqachlar baqidu balilirini
maysilarni toshup yiraq - yiraqtin
tizidu awaylap changgilirini.
tünde tipirliship, toruklishidu
seher sükütide churuqlishidu.
uchurma bolghanda qushqach baliliri
murasim qildi qushqach jamaetliri
herbir perwaz
herbir sinaqta
janlinar mehellining samawatliri.

shu chaghda
néminidur oylap kétimen
chékini tapay dep xiyallirimning
munchigha tughma bolup kirip kétimen.
qush köksige oxshaydu muncha
érip kéter dunyaning jinayetliri
tikenlik simlarda qashalan'ghan
telimat, otopiye imaretliri.

"qolumni qolumgha urdum.
eks sada yetken jayda
xire yénip turar ay"**
munchining témida horlan'ghan eynek,
élip ketken uzaqqa
sakura gülining shiwirlishini.
yétip bardim uni qoghlap
köygen xatiremning küli ichidin
tang örlep
özige izdimekte jay.
---------------------------
bu misralar yaponiye shairi bashu matsu (1695- 1644) ning.

kitablarda
bilimsizlik mikrobliri
peylasoplarning jawghaylirida
axiretning qurtliri
éwensiz asminida tagh choqqisining
tarixning xurapi bulutliri.

kel, jemile***
méwe shunche qimmet iken.
bir yutum quy alma süyidin,
qoshuwetkin uninggha azraq,
tomurungning hararitidin
birdem bolsimu
til heqqide sözleshmeyli
pelsepe kitablirini yépip qoyayli;
erwahqila oxshap kéter bu dunya
yoqsuzluqqa bashlap barar u goya
chiqip ketsun tütündek méngip
ishik, dérizilerni échip qoyayli.
-----------------------------
*** jemile -- aptorning ayali, yaponiyide.

shamal
ortaq bir til
herqandaq chüshensek bolidu uni,
ketmen bilen kompyutér ariliqida
jüdimekte bulbulning üni.
sheher hoshsiz
nur aliqinida
qalduq chüshiniksizlik hemmisi uning
tilning muddiasi sükütqu axir
toxtap qalayli mushu yerde
néme bolarkin axirida.

qum kölchiki

yatiqim keynide qum kölchiki
balilar oynash üchün kélip turar.
yoqalghan bir nersini izdigendek
mulayim qum tégini qézip turar.

yatiqim keynide qum kölchiki
qaraymen kitab oqup téliqqanda.
qum méning bolup qalar sirdashlirim
aqar söz arisida éziqqanda.

yatiqim keynide qum kölchiki,
chingqi chüsh aptipida qizip turar.
yurtumning sehrasini xiyal qilip
siqilghan yürikimni sézip turar.

yatiqim keynide qum kölchiki
chüsh körer balilarning aliqinida.
déngizgha bérip kéler biz körmeste
olturup sübhilerning salqinida.

"Tengritagh.net" din elindi

[ Next Thread | Previous Thread | Next Message | Previous Message ]
Forum timezone: GMT+6
VF Version: 3.00b, ConfDB:
Before posting please read our privacy policy.
VoyForums(tm) is a Free Service from Voyager Info-Systems.
Copyright © 1998-2019 Voyager Info-Systems. All Rights Reserved.