| Subject: 阿仙奴的足總杯之旅 4 MAY 2002 vs Chelsea |
Author:
Luis Figo
|
[
Next Thread |
Previous Thread |
Next Message |
Previous Message
]
Date Posted: 03:11:54 05/05/02 Sun
阿仙奴的足總杯之旅
首先,當然係恭賀阿仙奴勇奪足總杯冠軍,恭喜恭喜！
講返正題,阿仙奴今屆係足總杯既晉級過程中先係第三圈以4:2擊敗甲組既屈福特,再係第第四圈係九人應戰情況之下以1:0力挫強敵利物浦.跟住係第五圈再以5:2大勝甲組球隊基寧咸.到左八強,面對住勁旅紐卡素.首先在作客苦戰既情況下,以1:1打和對手,其後重賽返回高貝利球場(Highbury),則以輕鬆既姿態3:0輕取紐卡素.入到四強,係奧脫福(Old Trafford)面對住米杜士堡,大部分時間受制於對方既緊迫踢法,結果幸運地憑藉對方守衛費士達擺烏龍令阿仙奴得以1:0險勝米杜士堡而進入尋晚既足總杯決賽.
決賽係卡的夫千禧球場(Cardiff,Millennium Stadium)舉行,兩支決賽隊伍阿仙奴同車路士都分別排出最強陣容對戰.上半場兩隊係中場爭奪居多,但阿仙奴既控球時間較多,不過首兩次較入肉既埋門卻係屬於車路士的,分別係拿索斯同林柏特既遠射,但都未能考起今仗擔任正選門將既施文.
係21分鐘,阿仙奴有一記頗具威脅既攻門.當時韋拉係中場偏左既位置作出一記40碼既長傳,後上入楔既柏金見車路士既門將古迪仙尼出左黎多少,即刻銅頭一搖,皮球笠過左出迎既古迪仙尼,可惜以2,3個波位度斜出.其後羅倫接應韋托特係左路既傳中波一頂亦係緊緊高出.
下半場47分鐘,韋拉一記過頭波俾到係禁區內既亨利,亨利亦冷靜地扣過對方守衛米芝洛,然後起腳一熨,可惜因欠缺力水而被古迪仙尼拍出.
及後車路士大舉反撲,先有哈索賓基既遠射被施文接實,及後又有拿索斯係禁區頂起右腳施射又告越楣而去.但論最具威脅既埋門,相信要數到古莊臣係禁區K角位既笠射,不過被施文以單手托出底線.而阿仙奴亦有韋托特接應亨利妙傳後係禁區內射斜.
接戰至70分鐘,阿仙奴終於取得領前既優勢,當時韋托特係中場拎到波,避過車路士一名守衛,再斜傳俾後上既柏奴亞,正當眾人以為柏奴亞會交波俾左面既隊友的時候,佢卻選擇推橫係大約25碼位置度起右腳施射,皮球彎過迪西里直飛右上角, 雖然被古迪仙尼拍到,但仍然係右上角入網,阿仙奴領先1:0.
車路士失左波後便傾全力反撲,但未竟全功,反而係77分鐘爭D俾亨利既一次熨射而多失一球.
但3分鐘後,佢地始終都係要失第2球波.當時後備入替既伊度搶甩左古莊臣個波,然後交俾龍格堡,龍格堡拎到波後一直向前推進,並壓贏前來攔截既車路士中堅泰利,並係其他車路士守衛趕到之前係禁區邊左輔位起右腳熨射,皮球彎過古迪仙尼後貼住柱入網,阿仙奴領先至2:0.係呢個時候,眾阿仙奴球迷已經心知自己隊波可以繼98年後再奪足總杯,所以佢地都顯得十分開心.
終於係球證雷利既一聲長笛下,阿仙奴正式成為今屆英格蘭足總杯既盟主,而各阿仙奴職球員及阿仙奴球迷亦終於可以忘記舊年足總杯既不快,好好地慶祝一番.係兩位隊長阿當斯及韋拉高舉足總杯既同時,今屆英格蘭足總杯亦正式宣佈結束.
[
Next Thread |
Previous Thread |
Next Message |
Previous Message
]
| |
Feedback: 