| Subject: 世杯分析(Group A,B) |
Author:
figo
|
[
Next Thread |
Previous Thread |
Next Message |
Previous Message
]
Date Posted: 01:51:30 05/29/02 Wed
世杯分析(Group A)
Group A
法國(France)-----能夠係1998、2000同2001年分別奪得世界杯(World Cup),歐洲國家杯(European Championship)同洲際國家杯(Confederations Cup)冠軍,法國的確可以話係當今世上最強勁既國家隊,現時無一支球隊可以夠膽講能夠擊敗法國,但佢地是否真係可以力足再次贏得世界杯冠軍,相信未必如想像中咁樂觀.
後防方面,法國大致上會沿用四年前捧杯既人腳.今季係曼聯(Manchester United)醜態百出既巴夫斯(Fabien Barthez),雖然仍然係國家隊既第一號門將,但佢既穩定性比起四年前已有很大分別.今季係英超聯失左超過40球波既巴夫斯,係季初經常因為賣弄腳法,犯下了不少無謂既錯誤.幸好,佢係季尾已經開始穩定落絮.只要唔再玩野,佢依然係一位出色既守門員.法國既右後衛位置會係杜林(Lilian Thuram)既必然位置,不過佢今季轉打中堅後,有可能會代替退休既白蘭斯(Laurent Blanc)與隊長迪西里(Marcel Desailly)組成新既中路配搭.不過相信領隊拿美爾(Roger Lemerre)仍然會屬意迪西里夥拍拿保夫(Frank Leboeuf)這對中路守將.而效力巴塞羅拿(FC Barcelona)既基斯坦和(Philippe Christanval)則會係後備席上隨時候命.近三季係羅馬(Roma)有出色表現既98年世界杯舊將簡迪拿(Vicent Candela)有可能會代替年紀漸大既李沙拉素(Bixente Lizarazu)擔任正選左後衛.呢條法國防線最大既問題,應該係後防年紀較大,年屆34歲既迪西里,32歲既李沙拉素同30歲既杜林,速度及體力同4年前相比,可能會有一定既退化,所以今屆法國既後防線比起4年前應該會有所削弱.
法國歷來最強大既力量,都係來自中場.雖然迪甘斯(Didier Deschamps)係2000年歐洲國家杯後退休,但佢既退出對國家隊既影響並不大.由韋拉(Patrick Vieira)、施丹(Zidnedine Zidane),比堤(Emmanuel Petit)所組成既中場組合,與80年代由柏天尼(Michel Platini),居里斯(Alain Giresse)同泰簡拿(Jean Tigana)既「三劍俠」相比不遑多讓.由韋拉同比堤負責中場攔截及補位既工作,可以直接減輕後防既壓力,加上施丹既分波及後上射門,法國既中場仍然係充滿威力.中場最後一個席位本來應該會由今季係阿仙奴(Arsenal)有出色表現既皮利斯(Robert Pires)擔任,但由於皮利斯不幸地係阿仙奴vs紐卡素(Newcastle United)呢場足總杯賽事中受傷,所以無緣參與今屆既賽事.缺少左皮利斯,施丹既工作量將會大增.不過施丹係最近vs南韓既一場熱身賽中受傷,預料有可能會缺席分組賽頭兩場賽事,所以老將佐卡夫(Youri Djorkaeff)有機會會係頭兩場比賽取代其位置.而由於皮利斯因傷退隊,阿仙奴既韋托特(Sylvain Wiltord)會取代其位置.
過去多年黎,法國前鋒線上都欠缺一個出色既射手,不過而家既法國國家隊,卻出現了人滿之患.今季係阿仙奴大熟大勇既亨利(Thierry Henry)係國家隊既必然正選,佢同前球會隊友,一齊係97年世青杯成名既查斯古特(David Trezeguet),相信會係法國現時最具侵略性既前鋒拍檔..另外,今屆係歐塞爾(Auxerre)有出色表現既年青小將施斯(Djibril Cisse),壓到了安歷卡(Nicolas Anelka),被領隊拿美爾挑選入23名大軍之中.雖然佢只係第四前鋒選擇,但能夠壓到安歷卡而入選法國國家隊大軍,足見佢並非泛泛之輩.
法國國家隊既實力絕對係當今世上五支最強既球隊之一,無論踢法,球員合作和級數,都係十分出色.挾住三料冠軍(世界杯,歐洲國家杯同洲際國家杯)與及世界排名第一既餘威,相信要打入四強並唔係問題,至於能否衛冕成功,就要視乎天時,地利,人和而定.
預計法國既陣容
查斯古特
亨利 比堤 施丹 韋拉 韋托特
李沙拉素 迪西里 拿保夫 杜林
巴夫斯
預計最後成績:決賽份子
塞內加爾(Senegal)----以令人刮目相看既表現,首度闖入世界杯決賽圈,佢地不但壓倒了那些實力平平既球隊,而且可以話係從非洲區最艱難既一組中脫穎而出.西非雄獅塞內加爾以得失球既優勢壓倒了曾四度入圍世界盃決賽圈既摩洛哥,並且贏得小組第一名.他們同時也壓倒了同組另外兩支曾入圍世界盃決賽圈既球隊---阿爾及利亞和埃及.
這支前法國殖民地既球隊,主要重用一批係法國聯賽搵食既球員.門將方面,效力摩納哥(Monaco)既沙華會係既球隊正選門神.後防方面,右後防位置會係效力朗斯(Lens)既高尼(Ferdinand Coly ).而左後防位置則係效力法國球會聖伊天(Saint-Etienne),年僅20歲既拿度亞.而中路一對拍檔會係效力蒙彼利埃(Montpellier)既A.施斯(Aliou Cisse)與及M.迪奧普(Pape Malick Diop)
防守中場戴奧(Salif Diao)最近成功被利物浦(liverpool)收購,可見佢既實力不俗.事實上,戴奧除了攔截功夫了得,亦經常伺機後上射門爭取入球.雖然預料來季佢係利物浦最多都只會係後備球員,但同位置既謝拉特經常受傷,可能會令佢有唔少上陣機會.至於策劃塞內加爾攻勢既重責,就會落係效力歐塞爾既法迪加(Khalilou Fadiga )身上.塞內加爾左面既攻勢來源,會來自效力朗斯既B.迪奧普(Pape Bouba Diop),佢同活躍於右路既尼迪耶(Moussa Ndiaye)會係塞內加爾既側擊既重要力量.
效力朗斯既射手迪奧夫(El Hadji Ousseynou Diouf)係隊中最出名既球員,係外圍賽攻入八球成為隊中既神射手.佢最近被多間歐洲大球會斟介,所以佢一定會係今屆世界杯施展渾身解數,以求換取到一張更佳既合約.而塞內加爾既另一前鋒位置,則會屬於效力摩納哥既S.卡馬拉(Souleymane Camara).
由於世界杯係講求大賽經驗既場合,所以對於欠缺大賽經驗既塞內加爾,要闖過首圈係十分困難.不過,能夠係揭幕戰對住上屆冠軍法國,相信對於塞內加爾既一班球員,已經係不枉此行了.
預計塞內加爾既陣容
迪奧夫 S.卡馬拉
迪奧普 戴奧 法迪加 尼迪耶
拿度亞 A.施斯 M.迪奧普 -高尼
沙華
預計最後成績:首圈出局
烏拉圭(Uruguay)-----曾經贏過兩屆世界杯既烏拉圭,近年係國際球壇既表現乏善足陳.今屆烏拉圭係南美洲區外圍賽排名第5,得以晉身附加賽.係附加賽,烏拉圭以總數3:1淘汰澳洲(Australia),奪得世界杯決賽周最後一張入場券.
烏拉圭係出產門將方面,一直保持水準,以往既艾華士(Fernando Alvez),施奧利(Javier Zeoli)同R.洛迪古斯(Rodolf Rodriguez)都係烏拉圭既一流門將.現在係祖雲達斯(Juventus)擔任後備既卡連尼(Fabian Carini)係1999年世青盃既最佳門將,亦是近年冒起得最快既美洲門將.佢應該係今屆大賽中,最值得留意既新人門將.
後防方面,效力祖雲達斯既蒙迪路(Ronald Montero)係烏拉圭既後防支柱,這位意大利聯賽史上被逐出場次數最多既後防,係烏拉圭最難以闖過既守衛.與蒙迪路合作扼守中路既係效力國際米蘭(Inter)既蘇朗度(Gonzalo Sorondo),呢位中堅非常硬淨,佢同蒙迪路與及卡連尼係後防既鐵三角,後防剩餘既一個位置將會由林保(Daniel Lembo)擔任.
烏拉圭現時既中場線與以往相比,無論係創造力同卡士方面,都無法與法蘭斯哥利(Enzo Francescoli)年代相提並論.過往法蘭斯哥利既位置,今屆會由可以擔任攻擊中場或前鋒既列高巴(Alvato Recoba)擔任.列高巴係烏拉圭中場後上射門既威力,係最令對手害怕的,與列高巴係中場合作既球員應該會係羅馬(Roma)既古干(Gianni Giugou)與及季中轉投佩魯賈(Perugia)既奧尼爾(Fabian O'Niell),烏拉圭中場最後兩個位置,如無意外應該會係效力馬拉加(Malaga)既M.羅美路(Marcelo Romero)同華倫西亞(Valencia)既山度士.
今屆烏拉圭既前鋒線上有唔少選擇,係世界杯外圍賽後段有不俗表現既馬加蘭尼斯(Gerardo Magallanes),今季係威尼斯(Venezia)有唔錯既表現,佢同馬拉加既達里奧施華(Dario Silva)係烏拉圭前線既取分人物.後備前鋒方面,現效力曼聯既科蘭(Diego Forlan)係較出名既一員.
在附加賽死裡逃生既烏拉圭,係本屆外圍賽既表現並不穩定,作客既成績甚差,連弱旅委內瑞拉(Venezuela)也不敵過,加上球員既國際賽經驗並不算多,面對住法國同丹麥,要出線實在並不容易.就算能打入次圈,面對F組首名,無論係阿根廷抑或英格蘭,相信都係凶多吉少.
預計烏拉圭既陣容
達里奧施華 馬加蘭尼斯
列高巴
羅美路 奧尼爾 山度士 古干
蘇朗度 蒙迪路 林保
卡連尼
預計最後成績:首圈出局
丹麥(Denmark)-----10年前,丹麥以後補既身份奪取果屆既歐洲國家盃.4年前,丹麥係16強大勝非洲超霸鷹尼日利亞,入到8強,雖然面對住巴西,但仍然毫無懼色,更令到巴西吃盡苦頭.雖然最後以2:3不敵巴西,但可以話係光榮出局.
門將方面,現效力新特蘭既蘇連遜(Thomas Sorensen)現以成功取代舒米高(Peter Schmeichel)出任丹麥既正選守門員.佢既水準穩定,上中下三路波都好平均,相信舒米高可以安心退下來.
後防方面,丹麥會沿用過去既一班老將,AC米蘭(AC Milan)既凱域(Thomas Helveg)會扼守球隊既右後防,年青中堅馬田拿臣(Martin Lauresen)係後防中最具活力既一人,佢同2000年丹麥足球先生,現效力彭拿典奈高斯既軒歷臣(Rene Henriksen)係丹麥最重要既中路力量.左後防位置應該會係全隊最老,現年已38歲既PSV燕浩芬(PSV Eindhoven)左後防軒斯(Jan Heintze).這批丹麥後防經驗豐富,打法亦相當實際,但稍嫌年紀偏大,氣力方面令人擔憂.
過去勞特立兄弟(Michael and Brian Laudrup)既年代,丹麥既中場線充滿個人技巧,現在既丹麥中場線雖然冇左當年勞特立兄弟在陣時既出色技術,但係而家丹麥既打法十分機動,硬朗,反擊亦十分有效.丹麥既攻擊來源,會係來自車路士(Chelsea)既快翼干查(Jesper Gronkjaer)與及烏甸尼斯(Udinese)既佐真遜(Martin Joergensen),這兩位丹麥邊線球員都具備了出色既過關斬將功夫與及高速度.中場中路既位置,應該會由效力保頓(Bolton Wanderers)既托夫亭(Stig Toefting)與及愛華頓(Eveerton)既加維臣(Thomas Gravesen)擔任.
在外圍賽表現光芒四射既史浩克04(Schalke 04)中鋒辛特(Ebbe Sand),係丹麥係世界杯外圍賽既神射手.近兩季係德國聯賽大放異彩既佢,擁有高大既身型加上強勁既衝刺力,絕對係丹麥前鋒線上既一把尖刀.除左辛特之外,下季將會轉投AC米蘭既湯馬遜(Jon Dahl Tomasson)亦係丹麥另一位不可或缺既主將,佢既把握入球能力可能及不上辛特,但個人技巧方面則比辛特有過之而無不及,這對一高一矮既前鋒組合,將會係同組球隊後防既心腹大患.
對於丹麥黎講,今屆碰上踢法迂迴既烏拉圭與及非洲新丁塞內加爾,算係一個幾理想既抽簽結果,因為這支以打法實際見稱既北歐球隊,擅於以快打慢,烏拉圭同塞內加爾應該唔容易將丹麥打敗.若以次名出線,係十六強會面對住F組首名,應該會係阿根廷或英格蘭.丹麥並唔係無還擊之力,如果其他球隊一果唔小心,便有機會被這支黑馬球隊有機可乘.
預計丹麥既陣容
湯馬遜 辛特
干查 拖夫廷 加維臣 佐真遜
軒斯 馬田拿臣 軒歷臣 凱域
蘇連遜
預計最後成績:十六強出局
Group A總結:法國係呢組實力超班,首名出線至在必得,次名出線席位應該會落係大賽經驗較為豐富既丹麥身上.
Group B
西班牙(Spain)-----擁有世界上最高水平聯賽既西班牙,過往一直與錦標無緣,有人認為係西班牙缺乏大賽命所致,但真正原因相信係因為西班牙國內聯賽球隊大量起用外援,以致阻礙了唔少本土球員既成長,令西班牙一直係歐洲只係屬於一線尾,兩線頭既球隊.
門將方面,由於華倫西亞既簡尼沙利斯(Santiago Canizares)受傷,國家隊門將既席位預料會落在年僅21歲既皇家馬德里(Real Madrid)年青門將卡斯拿斯(Iker Casillas)身上.這位年青門將,雖然係季中失去正選席位,但仍無損佢係國家隊既正選席位.
西班牙的後防線中,老牌隊長希亞路(Fernando Hierro)如無意外應會第四次出席世界杯決賽週,佢係國家隊中經驗最老到既球員,而佢既罰球更係西班牙既入球殺著.而馬略卡(Real Mallorca)既中堅拿度(Miguel Nadal)應該會係希亞路既拍檔.而左右兩閘預料會係效力切爾達(Celta Vigo)既祖安法蘭(Juanfran)同擅於盯人既新秀佩奧爾(Carlos Puyol)
過去西班牙既中場線一直存在住攻強守弱既毛病,今屆西班牙中場卻沒有呢個毛病.效力巴塞隆拿既萬能老倌安歷基(Luis Enrique)與及華倫西亞既巴拉查會係中場線既後上殺手,而拉素(Lazio)既文迪達(Gaizka Mendieta)則會係右中場位置擔任正選,至於防守中場呢個位置,皇家馬德里既希古拿(Ivan Helguera)會係呢個位置既最佳人選.這批西班牙中場球員無論是邊線,防守或進攻球員皆具備係陣中,係近年黎人腳最完整既一條中場線.
效力皇家馬德里既魯爾(Raul Gonsalez),雖然只有24歲,但已經身經百戰.佢係國家隊既必然正選,並且係入球重心.不過,除了魯爾外,西班牙另一前鋒位置係一個令人難以抉擇既問題.本來老拍檔摩連迪斯(Fernando Morientes)會係最佳既人選,但今季拉科魯尼亞(Deportivo La Coruna)既迪斯坦(Diego Tristan)狀態甚佳,佢擅於把握機會既能力可減輕魯爾既入球負擔.但由於佢同魯爾唔係太過合拍,所以前鋒線上預料仍然會係魯爾夥拍摩連迪斯去攻堅.
西班牙係上屆世界杯爆冷未能出線,今屆世界杯再次被列為種籽,與巴拉圭,斯洛文尼亞及南非同組,相信西班牙要出線應該唔係問題,若果西班牙能夠以首名出線,好有可能會係八強遇上德國,以現時既人腳來看,擊敗德國絕不出奇.如果西班牙能夠調整球隊既心理質素,西班牙係有機會係今屆既世界杯做出驚人既成績.
預計西班牙陣容
魯爾 摩連迪斯
安歷基 巴拉查 希古拿 文迪達
祖安法蘭 希亞路 拿度 佩奧爾
卡斯拿斯
預計最後成績:八強出局
斯洛文尼亞(Slovenia)-----從南斯拉夫分裂出來既斯洛文尼亞,立國不足十年,但已經參加過2000年歐洲國家杯.今次更藉著附加賽擊敗羅馬尼亞(Romania)而首次打入世界杯決賽週.對於這個東歐小國黎講,可以話係一個十分難得既機會.
後防基本上沿用返2000年歐洲國家杯既人腳,門將會係施梅奴域(Marko Simeunovic),佢已經年屆34歲,相信今屆會係佢最後一次參加世界杯.而三人防線分別係效力謝菲聯(Jef United)既米連奴域(Zeljko Milinovic),華度歷(Muamer Vugdalic)與及加歷(Marinko Galic),這三位中堅既合作應該沒有太大問題
經過2000年歐洲國家杯既磨練,斯洛文尼亞既中場線已經開始成熟.卡歷(Amir Karic)將會係球隊既左中場,而現效力德國安特赫治(Unterhaching)既路華克(Dzoni Novak)會係國家隊中場不可或缺既一員,佢係球隊反守為攻既主力.另一位代表國家隊次數最多既中場球員施亞(Ales Ceh)係球隊既後上殺手.側擊方面,現效力波圖(FC Porto)既柏夫連(Miran Pavlin)係斯洛文尼亞右路攻擊泉源.而艾森莫域(Milenko Acimovic)則會係斯洛文尼亞既中場線上最耀目既新星.
斯洛文尼亞過去一直由’斯洛文尼亞之寶’沙豪域(Zlatko Zahoic)係前鋒線上單天保至尊,佢既腳法與及個人突破能力都係斯洛文尼亞既入球保証.不過近兩年沙豪域受到傷患既困擾,這大大影響了佢係國家隊既表現.另一位射手烏杜域(Saso Udovic),隨著年紀增長,漸漸失去昔日既射門威力,佢係國家隊既前鋒位置,已由效力樸茨茅夫(Portsmouth)既魯當查(Mladen Rudonja)所取代.另一位效力以色列球會(Hapoel Tel Aviv)既奧斯查(Milan Osterc)亦開始威脅到球隊必然正選沙豪域既位置.對羅馬尼亞附加賽射入一球既奧斯查,係斯洛文尼亞值得留意既後備前鋒殺手。
2000年歐洲國家杯中表現出色既斯洛文尼亞,經過兩年既洗禮後,經驗更加豐富,但斯洛文尼亞既攻擊力依然不足.今次第一次出席世界杯,加上球隊既老化問題,斯洛文尼亞對住西班牙預料會陷於苦戰.面對同樣善於防守既巴拉圭預料和波機會甚高,就算對住南非亦冇必勝既把握.所以,如無意外,斯洛文尼亞會係首圈出局.
預計斯洛文尼亞既陣容
魯當查
沙奴域
卡歷 施亞 路華克 艾森莫域 柏夫連
拿夫斯 加歷 米連奴域
史梅奴域
預計最後成績:首圈出局
巴拉圭(paraguay)-----上屆世界杯,巴拉圭係四場比賽法定時間90分鐘都能保持不敗,可惜係十六強被法國既白蘭斯以一記黃金入球而淘汰出局.但其穩健既後防線,已經俾人留下了一個深刻既印象.
最為人所認識既巴拉圭球員,必定係外號「老虎狗」既芝拉華特(Jose Luis Chilavert).這位擅於射罰球及救12碼既門將,雖然已經接近38歲,但佢係國家隊既領導地位仍然無人能代替.這位巴拉圭既隊長,將會係最後一次參加世界杯.佢既演出將會決定巴拉圭今屆世界盃的命運.
除了芝拉華特外,巴拉圭既後防將會沿用上屆世界杯既舊班底.效力巴西彭美拉斯(Palmeiras)既艾斯(Francisco Arce)係右後防既必然正選,這位巴拉圭後防踢法實際,而且助攻力甚強.中堅既兩個位置會由入選上屆世界杯最佳陣容既加馬拉(Carlos Gamarra)與及艾耶拉(Celso Ayala)擔任.這兩位中堅無論係身型,速度同防守技術都係一流的.佢兩位加上芝拉華特係巴拉圭既後防核心.至於後防既最後一席位相信會由簡尼沙(Denis Caniza)出任.由這批經驗老到既巴拉圭守將所組成既防線,絕對係巴拉圭爭取出線十六強既重要成員.
巴拉圭過去四年來,中前場既實力增強了不少,效力波圖既兩位中場大將昆坦拿(Victor Quintana)和彭尼迪斯(Carlos Paredes)係巴拉圭既必然正選.此外,上屆兩名舊將史杜維(Estanislao Struway)與及阿古拿(Miguel Acuna)都係不可或缺既中場力量.其中效力薩拉戈薩(Real Zaragoza)既阿古拿,更係球隊中場既靈魂,佢既後上射門係巴拉圭既殺著之一.
巴拉圭一向俾人一種守強攻弱既感覺,現年只有21歲既辛達告魯斯(Roque Santa Cruz),會係巴拉圭前鋒線既新希望.呢位係德國班霸拜仁慕尼黑(Bayern Munich)效力既巴拉圭國腳,被喻為係巴拉圭最有前途既新人.辛達告魯斯身材高大,不但頭槌了得,而且腳下功夫細膩,,如果冇左佢,巴拉圭既攻力將會大大減弱.除左辛達告魯斯,現效力墨西哥球會杜魯卡(Toluca)既卡度素(Jose Cardozo)會係巴拉圭既另一名前鋒.這兩位巴拉圭前鋒的合拍程度,並不下於任何一對前鋒拍檔,他們係不被人為意下,可能會有令人意想不到既演出.
係抽簽方面,巴拉圭再次同西班牙一組,對佢地黎講係頗為有利的.雖然人腳方面巴拉圭不及西班牙,但以佢地既防守力,守和西班牙絕不出奇.至於面對住南非,應該可以小勝而回.而對住東歐球隊斯洛文尼亞,相信可以坐和望贏.只要發揮正常,巴拉圭要出線十六強問題不大.不過攻力薄弱會係巴拉圭想再晉一級既最大障礙.
預計巴拉圭既陣容
辛達告魯斯 卡度素
彭尼迪斯 史杜維 阿古拿 昆坦拿
簡尼沙 C.阿耶拉 加馬拉 艾斯
芝拉華特
預計最後成績:十六強份子
南非(South Africa)-----第2次參加世界杯既南非,係繼尼日利亞同喀麥隆之後,近年冒起得最快既非洲球隊.上屆首圈己經提早出局,今屆南非再接再厲,務求爭取十六強既出線資格.
門將方面,效力荷蘭荷連芬 (Heerenveen)既雲克(Hans Vonk)係必然正選,這個位置並不作他人之想.而後防方面,效力列斯聯(Leeds United)既拉迪比(Lucas Radebe)除左係國家隊既隊長,更加係南非後防既支柱.同拉迪比一齊扼守中路既,會係現效力英格蘭甲組球會屈福特(Watford)既伊沙(Pierre Issa),這兩位係英格蘭搵食既防守球員,係隊中最具經驗既防守球員.右後防位置應該會屬於尼沙馬(Cyril Nzama),佢同現效力德國史特加(VfB Stuttgart)既左後防卡尼爾(Bradley Carnell)會係南非正選既左右兩閘.
中場方面,係國內聯賽搵食既文根尼(Bennett MNGUNI)同施巴耶(MacBeth SIBAYA),會聯同效力丹麥哥本哈根(FC Copenhagen)既蘇馬(Sibusiso Zuma)與及曼聯既科東尼(Quinton Fortune)組成一條南非既中場.擔任右中場既蘇馬,佢既後上威力係南非數糊人物之一.而南非隊中另一名中場主力,係係曼聯長居後備既科東尼,佢係南非中場線既大腦,主宰了南非既進攻節奏.個人技術不俗而且具備後上射門能力既科東尼,將會係南非最具威脅既一員.
上屆世界杯射入兩球既麥卡菲(Benedict McCarthy),係南非前鋒線上既必然正選.由於隊中另一射手巴列特(Shaun bartlett)受傷已經退隊,所以麥卡菲將會夥拍年僅20歲,現效力阿積士(Ajax Amsterdam)既新秀前鋒皮安拿(Steven PIENAAR)係前線攻堅.
南非雖然有左上屆參加世界杯既經驗,但係隊中好多球員仍然缺乏大賽經驗,如果南非能夠爭取到小組第三名,相信已經令人感到滿意.
預計南非既陣容
麥卡菲 路華迪
科東尼 文根尼 施巴耶 蘇馬
卡尼爾 艾沙 拉迪比 尼沙馬
雲克
預計最後成績:首圈出局
Group B總結:憑住較佳既球員質素,西班牙應該可以係呢組脫穎而出,以首名出線.而巴拉圭防守力同攻力都較其他兩隊強,預料可以聯同西班牙一齊出線.
[
Next Thread |
Previous Thread |
Next Message |
Previous Message
]
| |
Feedback: 