| Subject: Re: 世杯分析(Group C,D) |
Author:
figo
|
[
Next Thread |
Previous Thread |
Next Message |
Previous Message
]
Date Posted: 01:52:52 05/29/02 Wed
In reply to:
figo
's message, "世杯分析(Group A,B)" on 01:51:30 05/29/02 Wed
Group C
巴西(Brazil)-----從未缺席過任何一屆世界杯決賽周既巴西,要到外圍賽最後一場擊敗弱旅委內瑞拉才能夠肯定取得世界杯決賽周入場券.難怪睇好佢地能夠奪標而回既人並不多.到底有「足球王國」美譽既巴西,是否已經到左沒落既地步?
近年黎巴西出產既門將都唔差,泰法路(Taffarel),迪達(Dida)都俾到人一種穩健既感覺.至於係今屆世界杯擔任正選既馬高斯(Marcos),亦不比以上兩者為差.
傳統上,巴西既後防都係球隊既弱點,一條後防線經常為人垢病.近年,巴西轉打3-5-2陣式,三名中路守將分別係效力AC米蘭既洛基祖利亞(Roque Junior),效力利華古遜(Bayer Leverkusen)既盧斯奧(Lucio)同效力里昂既艾美臣(Edmilson).
巴西既中場線人腳鼎盛,左面自然係速度甚高兼善長射罰球既卡路士(Roberto Carlos),而右面則會係助攻力極強既卡富(Cafu).為左減輕後防所受既壓力,巴西中場會起用兩名防守中場,分別係基比圖施華(Gilberto Silva)同隊長艾馬遜(Emerson).淨返落黎既一個席位,當然係落係經常憑個人一己之力去扭轉乾坤既李華度(Rivaldo)啦！
前線方面,近期領隊史高拉利(Luis Felipe Scollari)採用「3R」組合負責攻堅,佢地分別係養傷多時既朗拿度(Ronaldo),效力巴黎聖日門既朗拿甸奴(Ronaldinho)同擅射既李華度.
呢個「3R」組合既威力,能否及得上昔日由白必圖及羅馬里奧既「夢幻組合」,現在仍然係未知之數,但從近幾場巴西既熱身賽中,可以睇到呢個「3R」組合既攻擊力的確強勁.只要朗拿度同李華度能夠及時剋服傷患,回服比賽狀態,呢個「3R」組合既肯定係各後防球員最唔願意見到的.
巴西近幾年既成績強差人意,先後輸俾厄瓜多爾,智利(Chile),玻利維亞(Bolivia),洪都拉斯(Honduras)等三,四線球隊,令到巴西國內既球迷怨聲載道.,亦令到眾巴西球迷信心盡失.不過世界杯經驗豐富既巴西,今屆抽得好簽,面對住既只係中國,哥斯達尼加呢D實力較弱既球隊,就算係土耳其相信都唔係巴西既對手,只要唔再輕敵,C組首名必定係巴西既囊中物.
預計巴西既陣容
朗拿度 朗拿甸奴
卡路士 艾馬遜 李華度 基比圖施華 卡富
洛基祖利亞 盧斯奧 艾美臣
馬高斯
預計最後成績:八強出局
土耳其(Turkey)-----過往,土耳其只係歐洲既三線球隊,但近年隨住唔少球員出國搵食,土耳其既實力已經進步了不少,係2000年歐洲國家杯亦能打入八強.
所以而家既土耳其絕非昔日既魚腩部隊.
門將一職方面,效力費倫巴治(Fenerbahce)既列巴(Rustu Recber)仍然會係首選,係2000年歐洲國家杯中有出色表現既列巴,把關技術不下於任何一位歐洲一流門將,最近還被盛傳會取代巴夫斯擔任曼聯既正選門將.由此可見,佢既實力已經被人認同.土耳其後防線會由阿士東維拉(Aston Villa)既中堅艾比(Alpay Ozalan),加拉塔沙雷既哥馬斯(Bulent Korkmaz),費倫巴治既O烏密特(Ozat Umit)與及布力般流浪(Blackburn Rovers)既安素(Hakan Unsal)組成4人防線,呢四位土耳其防守球員雖然名氣唔算好大,但對手前鋒要闖過佢地,並唔係一件易事.
土耳其既中場線球員大多數都係效力歐洲頂級球會,實力不容忽視.同係效力國際米蘭既艾美(Belozoglu Erme)同奧簡(Buruk Okan)雖然係球會中並非長期擔任正選,但已經足夠成為土耳其中場既正選.另外,效力AC米蘭既烏密達維拿(Umit Davala)會係另一名正選中場球員.防守中場方面,效力布力般流浪既杜基(Kerimoglu Tugay)會係不二之選,雖然佢已年屆32歲,但佢既體力同攔截技術並沒有顯著既滑落,而佢既遠射能力更係土耳其既另一殺著.中場線最後一個席位,會落係現年只有21歲,效力利華古遜既小巨人爾迪雷(Yildiray Basturk)身上,呢位係本季德國聯賽光芒四射既球員,係土耳其既中場指輝官,佢係本屆世界杯中最值得留意既新人之一.
提到土耳其,點可能唔提現效力柏爾馬既哈根蘇古(Hakan Sukur).呢位身型高大既前鋒,頭槌威力十足,係屬於典型既英式中鋒.土耳其能否入波,就全看呢位土耳其隊長既發揮.
土耳其係2000年歐洲國家杯既出色表現,已經向列強球隊發出了警號,本屆世界盃與哥斯達黎加同中國同組,對土耳其黎講係一支上簽,因為呢兩支球隊既實力同土耳其有一定既距離,只要小心應戰,要打敗佢地應該唔成問題.另外,係第一場賽事如果能夠守和巴西,土耳其要出線十六強將不成問題.
預計土耳其既陣容
蘇古
艾美 杜基 爾迪雷 烏密達維拿 奧簡
哥馬斯 艾比 安素 O.烏密特
列比
預計最後成績:十六強出局
哥斯達尼加(Costa Rica)-----對上一次參加世界杯係12年既事,當時既領隊正係現任中國隊既領隊米路天奴域(Bora Milutinovic).當時係一致俾人睇淡下晉身十六強,令好多人大跌眼鏡.12後,哥斯達尼加係冇左「神奇教練」既帶領下,仍然能夠以首名姿態昂然晉身世界杯決賽周.
鬥將方面,現年37歲既老將朗尼斯(Erick Lonnis)預料仍然會係首選.後防線既四人組合,預料會係係國內球會效力既右後防華萊士(Harold Wallace)同左後防既杜蒙(Jervis Drummond),而一對中堅M.胡禮(Mauricio Wright)與及G.馬天尼斯(Gilberto Martinez)會係必然之選.
中場線方面,右中場位置應該會由老將美福特(Hernan Medford)擔任,佢既經驗與及閱讀球賽能力,係雲祖柏既入球供應來源.左中場方面,效力國內聯賽既W.盧比斯(Wilmer Lopez)會係首選.而中場中路既兩個位置預料會落係曾效力打比郡(Derby County)既蘇利斯(Mauricio Solis)與及效力希臘聯賽既R.高美斯(Ronald Gomez)身上.
哥斯達尼加全隊最為人所認識既球員,一定係現效力曼城(Manchester City)既前鋒雲祖柏(Paulo WANCHOPE).步大力雄兼衝刺力強既雲祖柏,入球能力驚人,代表國家隊47次,已經射入34球.而同雲祖柏係前線攻堅既係係外圍賽射入10球既方辛卡(Rolando Fonseca).27歲既方辛加代表哥斯達黎加74次,射入38球,佢同雲祖柏非常合拍,只要同組既後防球員稍一唔留神,佢地就可以有機可乘.
雖然好多人認為哥斯達尼加既實力同中國差唔多,但哥斯達尼加能夠係中美洲區外圍賽以首名出線,可見佢地並非想像中咁弱.本屆哥斯達尼加首場賽事面對既,正係世界杯經驗最淺既中國,就算未能擊敗中國,要守和中國亦非難事.不過面對實力比自己高一班既土耳其及巴西,哥斯達尼加只能希望輸少當贏,相信哥斯達尾加既目標會係避免小組包尾.
預計哥斯達黎加既陣容
方辛卡 雲祖柏
W.盧比斯 R.高美斯 蘇利斯 美福特
杜蒙 M.胡禮. G.馬天尼斯 華萊士
朗尼斯
預計最後成績:首圈出局
中國(China)-----經過六次嘗試衝擊世界杯失敗後,終於係第七次成功取得世界杯參賽資格.所有炎黃子孫都為之雀躍及興奮.係「神奇教練」米路天奴域既領導之下,中國終於歷史性首次打入世界杯.
門將一職會落係江津(Jiang Jin)身上.事實上,身高達1米98既江津,係十強賽有不俗既表現,更曾係作客卡塔爾一仗中勇救一記12碼,成為晉級功臣.
後防一對中堅會係應屆亞洲足球先生范大將軍范志毅(FAN Zhiyi)與及李瑋峰(LI Weifeng),左閘方面會係善於處理自由球既吳承瑛(WU Chengying),而右閘則係現效力曼城既孫繼海(SUN Jihai).呢條後防線既表現,會直接影響中國能否係世界杯取得好成績.
中場方面,來自遼寧撫順既防守中場李鐵(Li Tie)會係中國隊既第一道屏障.現年24歲既李鐵,有「中國堅尼」之稱,佢已經日漸成為中國隊既中場核心.佢係十強賽既出色表現,已經引起荷蘭勁旅阿積士對佢既興趣.左右中場分別係老將馬明宇(Ma Mingyu)同李霄鵬(LI Xiaopeng),而善於後上埋門既祁宏(QI Hong),會係中國隊能否取得入球既重要人物.
前線方面,「郝董」郝海東(HAO Haidong)及係德國乙組球會法蘭克福搵食既楊晨(YANG Chen)會係必然正選.雖然呢個「郝楊」組合係十強賽入球唔多,但佢地經常拉開對方守衛,讓後上入楔既球員埋門.而且郝海東同楊晨既大賽經驗較為豐富,係世界杯呢D講求經驗既大場面,郝海東同楊晨既經驗更為重要.另外,年僅20歲既曲波(Qu bo),會係中國隊既主力後備.有「中國奧雲」之稱既曲波,速度高,有膽色,可以出任翼鋒,前鋒,甚至係進攻中場,故此得到米路所器重,預料佢會係中國隊中一隻重要既棋子.
雖然普遍傳媒都認為中國有力爭取出線十六強,但平心而論,中國隊既實力比起巴西同土耳其都差左一截,就算係對住實力平平既哥斯達尼加,中國隊都未必可以言勝.因此,與其希望中國能夠出線十六強,倒不如希望中國能夠取得入球更為實際.
預計中國既陣容
郝海東 楊晨
馬明宇 李鐵 祈宏 李霄鵬
吳承瑛 李瑋峰 范志毅 孫繼海
江津
預計最後成績:首圈出局
Group C:巴西實力超班穩奪首名出線資格,而土耳其球員既平均質素比中國同哥斯達尼加為好,所以土耳其可望憑較佳實力晉身十六強.
Group D
南韓(South Korea)-----今屆世界杯主辦國之一既南韓,已經係連續第六年晉身世界杯決賽周,呢個成績係眾多亞洲球隊之冠.雖然南韓曾經五次晉身世界杯決賽週,但卻未曾係世界杯決賽週賽中取得一場勝利.經過2000年亞洲杯既失敗後,南韓成功邀請到荷蘭著名教練軒迪克(Guus Hiddink)擔任南韓既領隊,因此南韓上下都期待著軒迪克係有主場之利既幫助下,帶領南韓出線十六強.
門將位置方面,李雲在(Lee Woon Jae)預料會係領隊軒迪克既首選.金泰映(Kim Tae Young)及崔鎮哲(Choi Jin Cheul)將會係南韓既後防主力,而將會第四度參加世界杯既老將洪明甫(Hong Myung Bo)則會負責係後防指揮南韓既防線.
為左爭奪中場,軒迪克將會派出五名中場球員,防守中場柳湘鐵(Yoo Sang Chul)將會係南韓中場線最具經驗既一人.而尹晶煥(Yoon Jong Hwan)則會從旁協助,左中場會係新人朴智星(Park Ji Sung),而右路方面則會係李榮杓(LEE Young Pyo).而攻擊中場呢個位置會落係效力佩魯賈(Perugia)既安貞煥(Ahn Jung Hwan)身上.
南韓兩個前鋒既位置,會由身材高大既崔龍洙(Choi Yong Soo)與及效力安德烈治(Anderlecht)既薛琦玹(Seol Ki-Hyeon)擔任
由於南韓身為種子球隊,係本屆世界杯分組賽無需對住法國,阿根廷等頂級球隊.有主場之利既南韓,首場對住波蘭會係關鍵所在,如能打和甚至擊敗波蘭,加上第二場賽事面對美國能夠全取三分,南韓出線次圈既機會便會高唱入雲.不過,以現時南韓球員既實力同經驗.出線十六強既機會只係一半一半,如果南韓要出線,便要係第一場對波蘭有超水準既演出.
預計南韓既陣容
崔龍洙 薜琦鉉
朴智星 柳相鐵 安貞煥 尹晶煥 李榮杓
金泰映 洪明甫 崔鎮哲
李雲在
預計最後成績:首圈出局
美國(U.S.A)-----隨住近年美國既大聯盟足球搞得有聲有色,美國既足球水平亦開始慢慢提高,而且國際足協排名亦躋身頭二十名之內,今屆係美國隊連續第四次殺入世界杯決賽週,美國隊上上下下都希望今屆能夠出線十六強.
門將方面,今季係布力般流浪有穩定表現既費度,將會受到效力熱刺(Tottenham Hotspur)既基拿(Kasey Keller)挑戰其正選既位置.後面四人防線分別係效力利華古遜既右後防夏度克(Frankie Hejduk),效力水晶宮(Crystal Palace)既左後防李捷士(David Regis),與及一對富有大賽經驗既中路守將阿高斯(Jeff Agoos)同樸比(Eddie Pope).
美國既中場線主要倚重現正效力英超球會新特蘭(Sunderland)既雷拿(Claudio Reyna),出生於阿根廷既雷拿,有著南美州球員既細膩腳法,善於穿針引線,佢將會係美國隊中既靈魂人物.另外,效力荷蘭阿積士既J.奧拜恩(John O’brien)係美國既新希望,佢會係左路不斷製造攻勢,而E.史超活(Earnie Stewart)則會係右路互相呼應.而防守中場一職就會落係效力富咸(Fulham)既利維士(Eddie Lewis)身上.
效力愛華頓既射手摩亞(Joe Max Moore)會聯同年僅20歲既當路雲(Landon Donovan)係前鋒線上攻堅,而擁有130次國際賽經驗既老牌國腳馬菲斯(Clint Mathis)則會係後備席上候命.
美國雖然連續第四次打入世界杯決賽週,大賽經驗應不成問題,但礙於美國既整體實力平平,要出線十六強係有頗大既難度.
預計美國既陣容
摩亞 當路雲
J.奧拜恩 雷拿 利維士 E.史超活
李捷士 阿高斯 樸比 夏度克
費度
預計最後成績:首圈出局
波蘭(Poland)-----繼86年世界杯後,今屆波蘭終於再次踏足呢個世界杯大舞台.係外圍賽中成為第一支出線世界杯既歐洲隊伍,到底這是否標誌著波蘭足球正式復興呢?
現時既正選守門員杜迪(Jerzy Dudek)肯定係現時世界上最穩健既門將之一.效力英超勁旅利物浦(Liverpool)既杜迪,季初由飛燕諾(Feyenoord Rotterdam)轉投利物浦代替韋斯達韋特(Sander Westerveld)把守獨木關.事實上,今屆利物浦成為英超失球最少既隊伍,杜迪可謂居功至偉.
後防方面,由效力史浩克04既華度治(Tomasz Waldoch)同夏圖(Tomasz Hajto),再加上比利時梅斯干(Excelsior Mouscron)既米高施拉高(Michal Zewlakow)與及凱沙羅頓(Kaiserslautern)既高斯(Tomasz Klos)所組成的防線,雖然名氣不算太響,但配合埋門將杜迪,係有能力應付任何強隊既前鋒.
現在波蘭既中場線,與以往全盛時期相比,明顯遜色得多由係外圍賽射入5球既卡奴斯尼(Rdoslaw Kaluzny),效力飛燕諾既雷沙(Tomasz Rzasa),馬賽既史維亞斯夫斯基(Piotr Swierzewski)與及係紐倫堡(Nuremberg)搵食既基斯諾域克(Jacek Krzynowek)組成既中場線,硬淨有餘卻嫌創造性不足.
有「黑色魯班斯基」之稱既奧利沙迪比(Emmanuel Olisadebe)係波蘭史上首位黑人球員.原藉尼日利亞既奧利沙迪比,係外圍賽一共替波蘭射入8球,現效力彭拿典奈高斯(Panathinaikos)既奧利沙迪比,正受到眾多歐洲球會既注視,預料佢會係世界杯後升價十倍.而奧利沙迪比既拍檔,應該會係效力法蘭克福(Eintracht Frankfurt)既基斯沙盧域(Pawel Kryszalowicz).呢兩位射手,會係波蘭既入球希望.
波蘭今屆被編入與葡萄牙,南韓同美國一組,預料面對住質數平平既美國應可小勝而回,而對住攻力強勁既葡萄牙則會以一分為目標.而南韓既實力與波蘭相比始終差左D,所以對住有主場之利既南韓,應可坐和望贏並且出線十六強.
預計波蘭既陣容
基斯沙盧域 奧利沙迪比
基斯諾域克 史斯華斯基 卡路茲尼 雷沙
高斯 夏圖 華度治 米高施拉高
杜迪克
預計最後成績:十六強出局
葡萄牙(Portugal)-----26年前,葡萄牙首次出席世界杯便憑藉「黑豹」尤西比奧(Da sliva Ferreira Eusebio)既驚人表現,帶領葡萄牙勇奪當屆既季軍.26年後既今日,葡萄牙已經擁有多名一級球星,今屆世界杯會係葡萄牙力圖爭取世界杯既最好機會.
葡萄牙既後防雖然稱唔上係一等一防線,但卻實而不華.效力布維斯塔(Boavista Porto)既列卡度(RICARDO)同效力波圖既拜亞(Vitor Baia)正分別為爭奪正選門將一席位而作最後努力.一般相信列卡度擔正既機會較高.四人後防線基本上同2000年歐洲國家杯無乜分別.右後防仍然會係「金毛獅王」沙維亞(ABEL XAVIER),左後防會係效力國內勁旅士砵亭(Sporting Lisbon)既雷佐治(Rui Jorge),兩名中堅依舊係佐治哥斯達(Jorge Costa)與及古圖(Fernando Couto)
葡萄牙最強既地方,就係佢地呢條「黃金中場線」.應屆世界足球先生費高(Luis Figo)係球隊既靈魂所在,費高無論盤,傳,射都係屬於世界級的.雖然佢今季因為受到傷患困擾而令到佢既表現有所下滑,不過今次係佢第一次,亦可能係最後一次參加世界杯,所以佢必定會好好珍惜呢次參加世界杯既機會,盡顯所長.而葡萄牙左路既攻勢來源,將會來自快翼干斯卡奧(SERGIO CONCEICAO),記得係兩年前既歐洲國家杯,干斯卡奧面對住德國既後防,輕易地大演帽子戲法.佢同費高經常調換位置,令到對方既後防球員無所適從.除左費高同干斯卡奧之外,雷哥斯達(Manuel Rui Costa)亦係葡萄牙中場既大腦之一.成名於費倫天拿(Fiorentina)既雷哥斯達,今季轉投AC米蘭之後因飽受傷患困擾而未能發揮自己應有既水平.呢位AC米蘭既中場指揮官,腳法秀麗,傳球獨到,只要及時克服傷患,雷哥斯達必定可以重拾昔日既光芒.剩下落黎既一個位置,預料會由現效力愛斯賓奴(Espanyol Barcelona)既保羅蘇沙(PAULO SOUSA)擔任.
葡萄牙既前鋒線亦一樣人材輩出,效力波爾多(Girondins de Bordeaux)既佩拉達(Pedro Pauleta)係球隊既出線功臣,佢係外圍賽為球隊射入7球,成為隊中既神射手.而葡萄牙既另一前鋒會係紐奴高美斯(Nuno Gomes).速度快,衝刺力強正係紐奴高美斯既特點.呢兩位射手係費高,雷哥斯達同干斯卡奧既供應下,絕對有力攻破任何防線.而效力波圖既祖奧賓圖(Manuel Joao Pinto)則會係後備席上隨時候命.
葡萄牙既一班主力,大多數都接近30歲,現時正值大勇大熟時期,相信今屆世界杯會係佢地最後一次大放異彩既機會.
預計葡萄牙既陣容
佩拉達 紐奴高美斯
干斯卡奧 保羅蘇沙 雷哥斯達 費高
雷佐治 古圖 佐治哥斯達 沙維亞
列卡度
預計最後成績:四強出局
Group D總結:美國及南韓既實力較弱,兩個出線席位將會由波蘭同葡萄牙奪得.由於葡萄牙既平均實力係波蘭之上,所以佢地將會奪得首名出線資格,而波蘭則會以次名資格出線.
[
Next Thread |
Previous Thread |
Next Message |
Previous Message
]
| |
Feedback: 