資者日記畀蟻民透啖氣啦 -- 皮蛋．黃．在家

[ Show ]

Support VoyForums

[ Shrink ]

VoyForums Announcement: Programming and providing support for this service has been a labor of love since 1997. We are one of the few services online who values our users' privacy, and have never sold your information. We have even fought hard to defend your privacy in legal cases; however, we've done it with almost no financial support -- paying out of pocket to continue providing the service. Due to the issues imposed on us by advertisers, we also stopped hosting most ads on the forums many years ago. We hope you appreciate our efforts.

Show your support by donating any amount. (Note: We are still technically a for-profit company, so your contribution is not tax-deductible.) PayPal Acct: Feedback:

Donate to VoyForums (PayPal):

[ Login ] [ Contact Forum Admin ] [ Main index ] [ Post a new message ] [ Search | Check update time | Archives: 1, 2, [3], 4 ]

[ Next Thread | Previous Thread | Next Message | Previous Message ]

Date Posted: 06:25:31 06/23/03 Mon
Author: x
Subject: 資者日記畀蟻民透啖氣啦

6月22日，周日。天氣時晴時雨，同香港經濟差唔多，疫埠之名周一可除，天災之後又來人禍？第二十三條7月9日進入最後辯論，7月1日已有五萬人申請上街遊行，估計到時唔止此數。特區政府真係死不悔改，做錯一鑊又一鑊，D人對政府已冇晒信心，你的高薪公僕更加畀班更高薪之部長玩到殘咗，整個政府面臨分崩離析局面，若冇唐大人撑住，恐怕已冇法子運作；不過，聽講冇精英肯出嚟執呢個爛攤子，因此溫總七一會嚟港「挺董」，但佢欣逢七一口罩大示威—到時有好多你的低薪公僕遊埋一份，由於怕畀上級責怪，一律帶口罩以隱去真面目兼響應政府「抗炎仍唔可以掉以輕心」也。

明知不可為而為精神可嘉

　　今早行山，眾行友集思冇益，對二十三條提出以下數點質疑—

　　一、警察毋須法庭批准可入屋搜查，當正我地班寫稿佬係走私、販毒咁，再有冇得人驚D？

　　二、以言入罪、以文字入罪而非要有行動才入罪，即連人家諗乜都要管？當年花生總統卡達話「見到靚女在腦海中想強姦佢」，我地可唔可以告佢想姦罪？

　　三、保安司有權取締一個組織，理由只係佢對呢個組織有懷疑，如果佢一時諗錯隔離，點算？

　　四、你知唔知乜嘢係國家機密？本報記者近日報道阿正串通上海靜安區官員做假數，算唔算國家機密？政府仍未批准已有人在報道港深珠大橋草圖，算唔算洩露國家機密？爆財政司司長買車避稅嘅大新聞，又算唔算係國家機密？

　　參加七一大遊行D人雖然已打輸數，事關冇理由畀美帝一批評便縮沙嘅，因此7月9日一定在立法會通過，港人明知不可為而為，精神可嘉。港人唔係反政府，只係同政府講我地擔心「言論自由」玩完！聽老記話呢次有好多非政治性團體透過電郵查詢點參加「七一遊行」，包括醫生、護士、老師、律師、公僕同學生等代表（但聽講冇牧師會上街），此乃異乎尋常之事。

　　二十三條等等的諮詢確定未够；去年第三季所謂諮詢文件回應超過千多份，但政府並冇一一解答疑問，咁重要嘅文件點解鐵定7月9日通過？港交所「仙股」事件可以押後，甚至政府委派錢果老等三人進行有關上市審批權研究，結論話應由港交所移到證監處，亦可押後十八個月再睇吓點，點解較神仙股事件及上市審批權更重要的基本法第二十三條，卻不能押後探討？

　　沙士事件剛過去，讓市民透透氣好唔好？

散戶入市係升市尾聲

　　上周五睇好的美股佔60.2%，睇淡佔16.1%，形勢一面倒，睇嚟反彈市本周繼續（通常响熊市二期的反彈都強而有力，呢次亦唔例外）。上周五信心指數急升，由72.2上升到86點，即短期大市仍然向上，雖然Lowry購買壓力指數在回落，而McClellan擺動指數已進入負數，展望後市夕陽無限好只是近黃昏，我老曹睇法係大市响6月25日前後見頂機會十分大。

　　納指一百指數自去年3月到2002年10月，跌幅80.04%，媲美1929至1932年道指跌幅89.13%。去年10月至今納指出現強力反彈，一D唔奇，不過道指需要二十五年時間才重見1929年高位，納指又點？道指呢次牛熊分界線响9504點，好友仍須努力；另一方面，我老曹要提醒各位，標普五百指數?狺T十二點八五倍、息率一點六六厘，响咁嘅水平，係咪忍手為上，真係各有各諗矣。

　　本周恆生指數估計仍追隨美股上試10250點關口，無論升穿或升唔穿，意義都唔大。95年日經平均指數亦曾出現一浪高於一浪後但熊市二期持續之例子。恆生指數响未來兩三個星期繼續波動，大市玩個別發展。

　　由大經紀行組成嘅A組成員，今年頭四個月一直佔總交易額一半以上，5月份出現變化，由細經紀行組成的C組成員，由4月份佔13.81%上升到5月16.73%；反之A組4月份佔54.03%，在5月份降至49.49%，B組所佔比重由32.16%，微增至33.78%。5月份港股平均每日成交八十一億八千九百二十四萬五千元，較4月升12.12%，恆生指數升8.81%。有充分證據證明，5月份股市上升係由散戶資金入市造成，此亦點解5、6月份二線股被炒到風生水起之理由。歷史話我地知，散戶入市通常係升市尾聲，4月25日開始的反彈，會否一如估計响6月結前結束？

　　4月25日恆生指數由8331點升到6月18日10061點，短短八個星期指數上升20.31%，到底係「後沙士現象」，抑或銀行存款利率太低引致散戶非理性亢奮？股市上升唯一理由係佢跌得太殘要反彈。企業為保持盈利或提升競爭力，依家仍在裁員：3、4、5月份失業率達8.3%；政府為紓減壓力製造五萬低薪職位，只能解燃眉之急，長遠絕對、肯定、徹底冇用。通常牛市由?狺K倍開始，而非依家?狺Q五點九四倍。有人認為利率低可抵銷高?牷A但經驗顯示股價與利率關係並不可理喻，高利率期上升股票可以係低息率，低利率期股票可以係高息率，一切睇投資者對前景睇法而定。依家設備使用率只有74%，地產泡沫爆破所產生的傷口仍在潰爛，科技股泡沫所帶來打擊仍未復元，大量設備過剩隨處可見，今天的消費者已非冇銀咁簡單，而係一早借爆額！

　　通脹於三十年代用來對付蕭條，戰後各國紛紛向美國學習，稍後凱恩斯提倡先使未來錢，徹底摧毀節儉習慣，最後令人們產生不勞而獲心態，財富集中响社會上一小撮投機倒把之人手中；反之，努力工作、節儉儲蓄者的財富，响通脹同負利率剝削下大幅消蝕，結果社會上愈來愈多人加入投機行列，因為冇人甘心被通脹剝削，造成九十年代股市非理性狂飈。然後97年7月出現亞洲金融風暴，客觀環境一下子改變，但特區政府八萬五政策出街，後尾又唔見咗，真係妙不可醬油！通脹變成通縮，炒樓不但唔再令人發達反而變成負資產，社會上類似神童輝嘅人一個接一個消失。樓價至今回落七成，仍然冇法抗衡地心吸力。政府已停止賣地、停售居屋、推出首置自置計劃，銀行物業按揭貸款已降至優惠利率減二厘半，不過依家每年需求仍係二萬個單位，但供應卻是每年三萬二千七百五十六個（未計政府手上二萬五千四百二十一個居屋），你說怎麽辦（重複）？私人住宅單位共一百零九萬三千個，其中自住約七十六萬五千個，三十二萬八千個係收租物業，今時今日毛租務回報約六厘—（唔計租客拖欠、走路、破壞公物），存款利率低於一厘，點解仍然冇人買樓收租？答案係去年樓價回落12%，租金下降14%，租務回報扣除樓價下跌，去年買樓收租者損失本金6%，同時面對一旦租約到期減租14.23%的威脅。換言之，响樓價穩定前買樓收租，並唔化算。

寫字樓租金2005年回穩

　　政府較少介入的寫字樓，97年8月至今寫字樓跌幅達73.44%，早已超過住宅樓跌幅。去年底寫字樓總存量九百二十八萬六千五百方米，甲、乙、丙級寫字樓分別佔57%、26%及17%，核心區係上環、中環、灣仔、銅鑼灣及尖沙咀，佔總存量67%左右。去年新落成十六萬五千六百方米，係2001年兩倍以上，其中約70%係甲級。去年新需求量係近年最低，令空置率升到12.6%，預測今年及明年新落成有二十三萬三千五百方米及三十七萬七千四百方米，2005年起供應量才急跌，估計2005年起寫字樓租金慢跌，如外國環境好D，可能企穩止跌。去年寫字樓售價平均跌9.04%，租金跌13.34%。去年甲級寫字樓空置量五百二十五萬七千三百方米，佔所有級別57%，其中約63%响港島區。去年甲級寫字樓售價跌11.43%，租金跌18.12%；乙級跌6%，租金跌10%；丙級跌8%，租金跌9%。估計要到2005年寫字樓售價及租金才可回穩。

　　阿正事件係咪代表上海房地產進入降溫期？有待觀察。此事已引發調查中銀香港（2388）前總裁阿寶同上海地產（067）之關係，令人明白所謂「關係」幾咁唔可靠。好多投資者已同上海房地產劃清界線，好多貸款亦因此按兵不動。响國民黨時代，上海同香港一樣，「七十二家房客」的情況普遍，解放至今五十多年，一幢浦西舊房子仍有十家以上房客共住，仍然好多，如按正常手續拆遷將極之困難，此乃引發上海房地產官商勾結之普遍現象。另一方面，94年至今上海房租回落唔少，主要係新樓供應大增，樓價亦大幅回落；不過，近年上海市政府開放物業市場，畀外資買賣所有住房而唔再局限外銷房，同時提供稅務優惠，過去兩年樓價略為回升，但今年樓價仍較1993年便宜四分一以上。國內地產發展仍以中小型地產公司為主，JP摩根估計全國十大發展商在四大城市市場佔有率只有16%，唔似本港依家71.11%物業由五大地產發展商佔有。如要間接投資國內房地產，可購入中國海外（688）、新世界中國（917）、合生創展（754）、上海置業（1207）及上周剛上市首創置業（2868）。例如中國海外市價只及賬面值零點四倍，主要係香港房地產仍在貶值；有別香港，國內房地產管理良好的地產公司唔多，例如合生創展市價早在賬面值之上。依家上海有外國僑民超過十萬（唔包括屬同胞性質的港胞及台胞），為豪宅最大支持。

汽車製造業開綠燈

　　响中國境內賺錢必須曉玩紅綠燈遊戲，此乃一位科大教授昔年在本報發表大作提出者也，即政府政策開綠燈時有得賺便賺，一旦政府開紅燈便一切停下來。近期上海房地產已開紅燈；反之汽車製造業似乎在開綠燈。

[ Next Thread | Previous Thread | Next Message | Previous Message ]

[ Contact Forum Admin ]

Forum timezone: GMT-8
VF Version: 3.00b, ConfDB:
Before posting please read our privacy policy.
VoyForums^(tm) is a Free Service from Voyager Info-Systems.
Copyright © 1998-2019 Voyager Info-Systems. All Rights Reserved.